Herfyri fylti ein av okkara fremstu granskarum, Bogi Hansen, havfrøðingur, 70 ár. Og sostatt fall hann fyri aldursmarkinum fyri at kunna vera í føstum almennum starvi.
Havstovan sigur, at í tí sambandi var samkoma á Havstovuni fyri honum týsdagin, har væl av fólki var komið at heiðra Hann.
Talan var bæði um fólk í Føroyum, sum hava tilknýti til gransking, og umboð fyri Fróðskaparsetrið, har hann hevur starvast og undirvíst í mong ár.
Útlendskir granskarar og samstarvsfelagar komu eisini á vitjan í hesum sambandi, sigur Havstovan.
- Bogi Hansen er kendur og virdur granskari, bæði i Føroyum og úti í heimi, staðfestir Havstovan.
Umframt slóðbrótandi gransking í føroyskum viðurskiftum, hevur hann eisini verið við í nógvum altjóða granskingarverkætlanum og hann hevur sett síni týðiligu spor í altjóða gransking.
Havstovan sigur, at hóast Bogi Hansen ikki longur kann vera í føstum starvi á Havstovuni longur, ber til at vera leyst knýttur at stovninum.
- Bogi er framvegis eftirspurdur samstarvsfelagi í altjóða gransking og fer at halda fram í altjóða granskingarverkætlanum, sum Havstovan er við í, sigur Havstovan.'
