Í takt við at ferðavinnan av álvara hevur tikið seg upp, hevur tað eisini elvt til ferðsluruðuleika í fleiri smærri bygdum. Teir nógvu, fremmandu bilarnir eru mangan til stóran ampa hjá bygdarfólkinum, tí tey sleppa ikki framat hjá sær sjálvum, ella tey sleppa frá húsum við bilum, landbúnaðaramboðum, og øðrum.
##med2##
Tjørnuvík er ein av mest vitjaðu bygdunum í landinum og um summarið leita nógv fólk, bæði føroyingar og útlendingar, sær til Tjørnuvíkar at njóta vakra umhvørvið. Tað er ofta til stóran ampa hjá tjørnuvíkingum. Tað er eisini ein forðing fyri, at sjúkrabilar, brandbilar, og onnur neyðsendarakfør fáa koyrt ótarnað. So nú hava Landsverk, Sunda Kommuna, og Visit Faroe Island, gjørt eina serliga skipan fyri ferðsluna í Tjørnuvík.
##med3##
Talan er um eina royndarskipan, ið verður sett í verk 6. juli, tað er í næstu viku, og sum verður galdandi í summar. Síðani verður skipanin eftirmett, og tá verður støða tikin til, hvussu ferðslan skal skipast framyvir. Somuleiðis verða royndirnar frá í summar brúktar til at meta um ein slík skipan eisini kann setast í verk aðrastaðni í landinum.
Tiltøkini, sum verða sett í verk í næstu viku eru hesi:
Landsverk setur ferðsluljós upp í Líðini oman móti Tjørnuvík, so at ferðslan glíður betri og tað slepst undan mótkoyrandi ferðslu á hesum smala strekki.
Bygdin verður stongd fyri óviðkomandi ferðslu, og øll, sum koma til bygdina, skulu parkera uttanfyri bygdina, antin á parkeringplássinum beint við bygdina, ella á parkeringsøkinum norðanfyri Haldórsvík.
Sensorar eru lagdir í parkeringsplássini í Tjørnuvík og skelti verður sett upp í Haldórsvík, sum vísa, um parkeingspláss eru tøk í Tjørnuvík.
##med4##
