Svøríki er evropameistari hjá monnum í hondbólti, og tí var givið, at tað fór at vera ein torførur dystur hjá okkara U18-manslandsliðið, ið spældu fyrsta dystin í innleiðandi EM-bólkaspælinum móti Svøríki í Podgorica í Montenegro.
Føroyar taptu tepurt 29-32 fyri Svøríki. Í steðginum var Svøríki á odda 17-15.
Í fyrra hálvleiki fylgdust liðini til støðuna 5-5. So byrjaði Svøríki at draga frá, og við støðuna 17-12 byrjaði at síggja eitt sindur svart út, men okkara menn endaðu hálvleikin væl við trimum málum, og so vóru bert tvey mál á muni í steðginum.
Svøríki hevði leiðsluna fyrsta partin av seinna hálvleiki, men tað eydnaðist føroyska liðnum at javna til 24-24 og til 25-25, men tað eydnaðist ikki føroyska liðnum at leggja seg á odda í seinna hálvleiki.
Svenskarar komu upp á 30-25, men okkara menn stríddust seinastu løtuna og fingu minkað munin niður til trý mál.
Tey sum halda við Sävehof vistu uttan iva undan dystinum í dag hvør Óli Mittún er, tí hann skal spæla við Sävehof komandi kappingarár.
Aftaná dystin í dag munnu øll sum hava áhuga fyri svensku hondbóltsdeildini hava fingið við hvør Óli Mittún er. Óli skoraði heili 17 mál upp á 22 málmøguleikar, og var sjálvandi valdur at vera besti leikarin hjá Føroyum.
Fyrr í dag vann Spania 41-33 (21-17) á Fraklandi.
Støðan í undanbólki D er, at Spania og Svøríki hava tvey stig, meðan Føroyar og Frakland einki stig hava.
Í morgin klokkan 13 spæla Føroyar móti Spania.
Svøríki-Føroyar 32-29 (17-15)
Svøríki: Axel Mansson 9, Linus Gustavsson 7, Arvid Boquist 5
Føroyar: Óli Mittún 17, Ísak Vedelsbøl 3, Rókur Ziskason 3, Tróndur Johnsson 3, Høgni Heinason 2, Niklas Gaard 1.
Alaksandar Lacok bjargaði seks av 32 málroyndum, ið er 18,75 prosent. Torstein Sivertsen bjargaði ongari av seks málroyndum.
