Einki mál varð skorað, tá ið TB í góðum líkindum í Trongisvági hevði vitjan av ÍF.
Undan hesum umfarinum var tað greitt, at ÍF í 2023 fer at spæla í bestu deildini. Í dag var spurningurin, um TB fór at vinna og harvið undan síðsta umfari aftur fór at leggja seg á fremsta plássið, sum TB hevur verið á nógv størsta partin av kappingarárinum.
At tað endaði málleyst ber við sær, at ÍF hevur tryggjað sær fremsta plássið í deildini. Undan 27. og seinasta umfari hava fuglfirðingar 56 stig, og TB hevur 52 stig.
Tað er ikki púra avgjørt, at TB í 2023 fer at spæla í bestu deildini, men eftir javnleikin við Stórá í Trongisvági í dag er støðan soleiðis, at tað mest sum ikki ber til hjá TB at sleppa undan at flyta upp. TB hevur 52 stig og málmunin +31, og B71 hevur 49 stig og málmunin +23.
Í síðsta umfari fær ÍF vitjan av B71, og TB fer í síðsta umfari at spæla á útivølli ímóti Undrið FF.
Meðan ÍF tríggjar tær seinastu ferðirnar hevur vunnið sjey stig, so var dysturin í dag tann fimti á rað, at TB fór av vøllinum uttan at hava vunnið fulla úrtøku. TB úrtøkan í hesum fimm dystunum hevur verið tvey stig.
