Gamli Akraberg er seldur og hevur tverið sín seinasta túr fyri Framherja í Barentshavinum. Byggingin av nýggja skipinum hevur gingið væl. Skrokkurin kom úr Rumenia fyrst í januar í ár og til Noregs, og nú líður móti endanum.
- Vit eru ógvuliga spent, tí hetta verður okkara fyrsti nýbygningur.
Tað sigur Elisabeth Eldevig Olsen hjá Framherja í Fuglafirði.
Hon ásannar, at góða gongdin hjá felagnum hevði ikki borið til uttan nógv og góð fólk, og tað er júst hetta, sum eyðkennir manningar og starvsfólk hjá Framherja.
- Einsamallur gert tú einki, og hetta hevði ikki borið til uttan øll hesi fólk. Vit hava dugnaligar og trúgvar manningar umborð á okkara skipum, og soleiðis er eisini í umsitingarpartinum.
Elisabeth vísir á, at roynt verður at seta nýtt við og at fáa ungar kreftir umborð, men lítil útskifting er, og eingin verður koyrdur í land.
- Nýggja skipið fer beint av skipasmiðjuni í Noregi og til fiskiskap í Barentshavinum, og longu nú eru nakrir av manningini farnir yvir at rigga til, sigur hon.
Manningin á nýggja skipinum verður hin sama sum við gamla Akrabergi.
- Við skipinum hvønn túrin verða 24 mans, men 48 verða knýttir at skipinum. Soleiðis eru menninir umborð í ein túr - og so heima í ein. Hetta er ein skipan, sum vit hava havt í nøkur ár, og hon hevur riggað væl.
##med2##
Tá Akraberg fer beint til fiskiskap, verður manningin flogin yvir til Noregs, tá tíðin nærkast.
Spurd, hvussu tað fer at gangast at fiska kvotuna, sum Framherji eigur í Barentshavinum, nú gamli Akraberg ikki ger nakran túr aftrat, sigur Elisabeth Eldevig Olsen:
- Akraberg hevur fiskað væl tað, ið farið er av hesum árinum, og tí vænti eg ikki, at tað verður nakar trupulleiki, tá nýggi Akraberg longu verður klárur tíðliga í summar, sigur hon.
Nú nýggja verksmiðjuskipið hjá Framherja skjótt verður liðugt, er greitt, at navnið Akraberg FD10 fer at liva víðari á nýbygninginum.
- Tað var meira av tilvild, at Akraberg í sínari tíð gjørdist navnið. Flestu skip í Barentshavinum høvdu líka sum -berg til “eftirnavn”, og vit leitaðu so eisini eftir einum navni, ið minti um hini nøvnini.
Elisabeth Eldevig Olsen sigur, at tá tey so duttu á navnið, Akraberg, hildu tey, at hetta fall væl í oyruni.
- So, vit fara ikki at broyta navnið, nú nýggja skipið kemur í føroyska fiskiskipaflotan, sigur hon.
Kríggið í Ukraina fyllir sjálvsagt nógv, og tað er ikki sørt, at tað órógvar.
- Jú, hetta er sjálvsagt nakað, vit hugsa um og sum vit eiga at hugsa um, serliga við atliti til tær lagnur, sum krígsførslan hevur við sær. Higartil í ár hevur Akraberg bara fiskað í norskum sjógvi, og hetta er, sum tað plagar at vera.
Hon vísir á, at seinna hálva av árinum vanliga er í russiskum sjógvi.
- Vit hava ábyrgd av manningini, og vit hava ábyrgd av skipinum, og í løtuni er trupult at siga, um kríggið fer at fáa nakra ávirkan á møguleikarnar í russiskum sjógvi, men tað vóna tey sjálvsagt ikki.
Elisabeth Eldevig Olsen sigur, at toskastovnurin, sum Akraberg fiskar av í Barentshavinum, gýtir við Lofoten, og síðan er fiskurin í norskum sjógvi í fyrru hálvu av árinum.
- Sum tíðin gongur, fer toskurin í russiskan sjógv at fita seg, og hetta er sambært fiskifrøðingum sami stovnur, sum gýtir við Lofoten og sum í fyrru hálvu verður veiddur í norskum sjógvi, sigur hon.
Í VikuskiftisSosialinum, sum hesaferð kom hósdagin, er serblað um vinnu, og hesaferð verður dentur lagdur á sjóvinnu í breiðari merking. Blaðið fæst til keyps í blaðsølunum kring landið.
