Veruleikin vísir okkum, at blokkstuðulin nú er minni enn helvtina av tí, sum hann hevði verið, um hesin blokkniðurskurðurin ikki varð gjørdur. Og hevði Løgtingið ikki samtykt hann, so var hann heldur ikki skerdur, tí talan er um føroyskan politiskan vilja, at danir ikki skulu lata okkum stuðul á henda hátt. Tað er á ongan hátt eitt danskt fyribrigdi.
Vit kunnu eisini staðfesta, at allir flokkar nú halda, at hetta er í fínasta ordan. Tí hvørki Sambandsflokkurin og enn minni Javnaðarflokkurin tosa um at fáa ríkisveitingina uppaftur at sama støði, sum hon var í 2001.
Fyri nógv er ríkisstuðulin symptomið uppá »donsku imperialismuna« í Føroyum. Fleiri geva hesum kortini ikki gætur.
Men um vit nú spæla okkum við tankan um, at ríkisstuðulin púrasta verður avtikin eftir nøkrum árum. Ber tað so til?
Svarið má vera ja. Sjálvandi ber tað til. Tá vit seinastu 20 árini hava niðurlagað ríkisveitingina við meira enn 50 prosentum, so ber tað eisini til at niðurlaga hina sløku helvtina næstu 20 árini – ella næstu 10 árini ella kanska 5 árini.
So er spurnigurin, um tað verður loysingarvongurin, sum fer at gera tað. Men tað er als ikki vist.
Fyri bæði Javnaðarflokkin og Sambandsflokkin, so er tað eitt politiskt mál, at vit í Føroyum skulu vera búskaparliga sjálvbjargin. Sjálvandi skulu vit tað. Og sjálvandi klára vit tað. Tí trúðu vit ikki upp á tað, so var einki sjálvræði at arbeiða fyri, so kunnu vit tað sama leggja okkum undir kong. Tað er tað helst eingin sum vil. Ikki ein gong Sambandsflokkurin.
Vit fara tí í næstum helst at síggja, at Javnaðarflokkurin fer at seta sær sum mál at minka ríkisstuðulin. Á tann hátt kann Javnaðarflokkurin leggja seg á eina enn størri fjøld av veljarum, sum annars kundu farið til Tjóðveldi. Og tá Sambandsflokkurin eisini tekur undir við hugskotinum, so er málið um ein sjálvberandi føroyskan búskap í eygsjón.
Um tað so merkir loysing frá Danmark, ja tað kann tá gerast ein heilt annar spurningur.
Málið um ríkisstuðulin kann soleiðis gerast eitt mál, sum kann flyta valdið í føroyskum politikki til at snúgva seg um høgra og vinstra heldur enn loysing og samband – og harvið hvørvur blokkurin sum búskaparliga jarnbrotið fyri ella ímóti Danmark.
