Tó so, tað eru fólk, sum hava fingið gleiði av flatskattinum, men trupulleikin er bara tann, at tað ikki eru tey fólkini, sum høvdu nýtt peningin til økta nýtslu, sum hava fingið gagn av hesum lætta.
Men tað ljóðaði so pent, tá Fólkaflokkurin orðaði tað í samgonguskjalinum, at »tað skal loysa seg at arbeiða«. Gongd skuldi fáast á búskapin við eini skattaskipan, sum ikki tekur hugin frá fólki at arbeiða.
Hinvegin kunnu vit øll staðfesta – bæði tey, sum eru fyri flatskattinum og tey, sum eru ímóti – at flatskattaskipanin er komin fyri at verða. Soleiðis plagar tað altíð at verða við politiskum skipanum hjá Fólkaflokkinum. Hóast øll hini siga seg verða ímóti, so fær Fólkaflokkurin broytingarnar samtyktar kortini – og eingin samgonga er før fyri at nerta skipanirnar aftur. Eitt dømi er fiskimannafrádrátturin, og nýggjasta dømið er flatskatturin.
Latið okkum ímynda okkum, at vit eftir næsta val hava eina samgongu millum Javnaðarflokkin og Tjóðveldisflokkin saman við onkrum klípum úr teimum smáu flokkunum. Tá skal eitt landsstýrið mannast við átta fólkum, sum fáa lønarhækkingina, sum Kaj Leo Johannesen helst fær í gjøgnum fyri landsstýrisfólk upp á nakrar hundrað túsund krónur. Tað merkir, at hvørt landsstýrisfólk av egnum huga og av egnum vilja og av egnum gerðum sjálvboðið skal rinda 50.000 krónur eyka í skatti – og løgmaður góðar 60.000 krónur. Ein samlað eyka skattarokning til landsstýrisfólk upp á 4-500.000 krónur um árið?
Er tað hugsandi?
Hvørt løgtingsfólk skal somuleiðis áleggja sær sjálvum eina eyka skattarokning upp á einar 2.000 krónur um mánaðin bara av løgtingslønini.
Er tað hugsandi?
Og mest av øllum verður tað helst ein fólkauppreistur, tá tey, sum hava fingið so stóran lætta nú skulu kenna seg at verða við sviðusoð.
Hjá Palliba verður eingin munur.
Flatskatturin er tí komin fyri at verða. Her vendst ikki aftur. Vit kunnu akkurát tað sama viðganga tað og siga tað sum tað er, at gjógvin veksur millum stættirnar í Føroyum. Hetta er politikkurin hjá Jørgen Niclasen, og hetta er politikkurin, sum ein meiriluti av føroysku veljarunum vil hava – trumfaður ígjøgnum saman við Jenis, Kára, Kaj Leo og atkvøðuneytum teirra.
