Dømi um tað er, tá fyrrverandi løgmaður vildi draga løgmann og Høgna Hoydal, landsstýrismann, til svars fyri at hava logið fyri Løgtinginum.
Sjálvandi skulu landsstýrisfólk ikki lúgva, og sjálvandi skulu tey hava síni viðurskifti í lagi. Tað sum løgmaður førdi fram á Viðareiði á tíðindafundi um russisku veiðuna í Føroyum vóru ikki røtt tøl, og tað er ikki gott nokk av løgmanni og umsiting hansara, at tey ikki hava røttu tølini. Men tað merkir ikki, at hann royndi at villleiða – og hann kann ikki villleiða Løgtingið á einum tíðindafundi. Tað skuldi so verið fjølmiðlarnar og Føroya fólk, hann vildi villleitt, tó at tað líkasum ikki gevur meining, tí fakta kann altíð prógvast. Og hitt málið viðvíkjandi Høgna Hoydal kann í besta føri kom undir at vera mismæltur, tí hann í sama andarátti tók tað í seg aftur, sum kundi skiljast sum um, at limirnir í uttanlandsnevndini kundu greiða floksfeløgunum frá tí, ið farið er fram. Sjálvandi kunnu teir ikki tað, og tað veit Høgni Hoydal eisini. Og tað vita øll tingfólk. Tí virkar tað eisini so undarligt at hoyra tingfólk tosa um »eina loyniliga frágreiðing, sum tey ikki sleppa at síggja«. Soleiðis er skipanin nú einaferð, og hvør flokkur hevur sítt umboð í uttanlandsnevndini, sum kann siga sínum floksfeløgum, um tað er í ordan, sum fer fram í uttanlandsnevndini, tó at tey ikki kunnu siga, hvat tað er, ið fer fram. Soleiðis er skipanin, sum Løgtingið sjálvt hevur gjørt.
Tað er í fínasta ordan, at politikarar eru ósamdir. Men tað má vera okkurt minstamark, onkur »bagatelgrensa«, hvørjum farið verður eftir.
Fyri valið vóru samgonga og andstøða rúkandi ósamd um samstarvið við Russland. Andstøðan segði nei og samgongan fyri tað mesta ja. Nýggja samgongan er blotnað. Er ikki so avgjørd um, hvussu vit skulu revsa Russland fyri at drepa ósek børn, kvinnur og menn. Tey taka ikki líka stóra frástøðu frá bøðilinum Putin, sum áður. Vit kunnu siga, at andstøðan hevur partvíst vunnið stríðið um, at tað er ikki so farligt »at samstarva við tann feika«. Andstøðan hevur fingið landsstýrið at vera minni russaraóvinarligt. Hetta er farligt spæl, sum kann kosta nógv í komandi tíðum, tá vit verða dømd upp á gerðir okkara.
– Gevist við uttanumsnakki. Førið heldur politikk enn at keglast um fjant og fjas!
