Andstøðan skjýtur upp at seta inn í lógina um vinnuligan fiskiskap, at veiðiloyvi bert eru tíðaravmarkað brúksloyvi og kunnu ikki avhendast millum eigarar av fiskiførum ella til onnur. Um fiskifar skiftir eigara, so fellir veiðiloyvið og øll fiskirættindi beinanvegin aftur til landið.
Poul Michelsen, formaður í Framsókn segði við útvarpið, at tey í andstøðuni ræðast tað, sum nú fer fram. Hann segði, at trýstið er massivt, nógvar sølur fara fram, sum slett ikki hava nátúrligt grundarlag. Hann sigur, at lógin um vinnuligan fiskiskap er útholað og vísir á, at hon er broytt meira enn 100 ferðir.
Tað er lætt at semjast um skeivleikan í tí, at ávísir reiðarar skulu kunna gera sær dælt av, at teir hava fingið fiskiloyvi – at teir kunnu selja tann fisk, sum enn svimur í sjónum, og soleiðis ríka seg – í summum førum við hundraðtals milliónum, sum ein illa smíðað lóg um kapitalvinningsskatt – ella eitt tilvitað hol í lógini – kann geva reiðarum skattafrítt niður í lumman.
Hinvegin er tað eisini lætt at semjast um tað, sum Bjarni Djurholm sigur um, at vinnan má vita, hvar hon flýtur. At trygd má vera fyri, at íløgur kunnu forrentast, og at ikki kappað verður á stokkinum.
Í so máta hevur hann rætt í, at tað er eitt populistiskt uppskot at koma við soleiðis í tøkum tíma. Men fyri tað er uppskotið áhugavert. Og tað, sum ger tað serliga áhugavert er, at tað hevur ongan kjans at verða samtykt av tí einfaldu orsøk, at Fólkaflokkurin er ímóti tí. Og Fólkaflokkurin hevur takið á Sambandsflokkinum, og tí verður uppskotið ikki samtykt. Og tá teir smáu flokkarnir í samgonguni bara virka sum atkvøðuneyt, so er slagið hjá Fólkaflokkinum vunnið upp á forhond.
Tað er uttan iva meiriluti í løgtinginum fyri at ger hesa broyting – tillagað so ella so – sum andstøðan skjýtur upp. Uttan iva kundi stórur partur av Sambandsflokkinum tikið undir við tí og harvið teir smáu eisini. Men tað er eitt søguligt faktum, at í eini samgongu, har Fólkaflokkurin er partur, har ræður Fólkaflokkurin eina í fiskivinnupolitikki eins og skattapolitikki. At tað nú er Sambandsflokkurin, sum ger sum Fólkaflokurin vil, er rein tilvild. Javnaðarflokkurin og Tjóðveldi gera júst á sama hátt, tá teir eru saman við Fólkaflokkinum.
Tí kunnu søluhugaðu reiðararnir sova trygt so leingi Fólkaflokkurin situr í Tinganesi.
