Politisku ungmannafeløgini vórðu eisini spurd. Hóast Fólkaflokkur, Javnaðarflokkur og Tjóðveldi tóku ímóti uppskotinum við opnum ørmum, so var umboðið fyri Sambandsflokkin afturhaldandi. Ungi sambandsmaðurin man halda tað vera íborið at vera konservativur og stríðast ímóti framstigum – hóast margháttligt fyri eitt politiskt ungmannafelag, sum vil hava ávirkan.
Studentaskúlanæmingar eru heldur ikki tað, sum teir plagdu at vera. Sjónvarpið spurdi nakrar næmingar í Hoydølum um teirra hugsan, og tey vóru als ikki sannførandi. Hildu ikki, at sekstan ára gomul eru nóg búgvin at taka slíkar »týðandi avgerðir«, vildu fleiri teirra vera við.
Vit kunnu sjálvandi altíð tosa um mørk. Skalt tú til dømis eisini sleppa at koyra bil, tá tú ert 16? Men tað er ov einfalt at koma til ta niðurstøðuna, at sleppur tú at velja fólk á ting, so mást tú eisini sleppa at koyra bil og keypa brennivín. Soleiðis nýtist sjálvandi ikki at vera.
Sum sekstan ára gamal hevur tú nøkur rættindi. Tú rindar skatt, um tú hevur inntøku, tú kanst revsast og so framvegis. Hví skalt tú ikki eisini sleppa at vera við til at gera av, hvør skal stjórna landinum? Tað verða sjálvandi ikki tey 16 og 17 ára gomlu, sum einsamøll fara at manna løgtingið. Men tey verða við til tað, og hví skulu tey ikki tað?
Tað er ein støðug gongd at broyta valrættaraldurin. Frá at ognarleys sluppu at velja, og at kvinnur fyri minni enn 100 árum síðani sluppu at velja, er valrættaraldurin støðugt lækkaður frá 35 árum og niðureftir. Seinast frá 20 til 18 í 1984 – við virknaði fyri løgtingsvalið í 1988.
Tað eru 28 ár síðani, at løgtingið lækkaði valrættaraldurin úr 20 til 18 ár. Nógv er broytt í heiminum síðani tá, og somuleiðis tey ungu, sum búgva í hesum heimi. Tey ungu standa fyri nógvum valum av ymsum slag, tey møta nógvum trupulleikum, sum fyrr bara vóru fyri eldri ungdómar. Hetta er ein veruleiki, sum tey skulu fyrihalda seg til aktivt, vælupplýst og kritiskt til.
Tey kunnu fáa børn, tey oman fyri undir kriminella lágaldurin og skulu gjalda skatt. Men tey sleppa ikki á val, vera við til at gera av, hvør skal vera løgmaður og ávirka tær avgerðir, sum hava beinleiðis avleiðingar fyri teirra lív hvønn dag. Hetta er veruleikin hjá teimum 16-17 ára gomlu.
