Landsstýrimaðurin í innlendismálum upplýsti í útvarpinum, at hetta var eitt ynski frá umsitingini at broyta lógina soleðis, at tað ikki verður møguligt hjá fjølmiðlum at fáa innlit í setanarviðurskifti hjá einstaklingum, sum starvast hjá tí almenna.
Bara tað, at tað er umsitingin, sum ynskir hetta, er ein ávaring í sjálvum sær. Og tað er als eingin lætti hjá fjølmiðlunum, at Kári P. Højgaard ikki væntar, at broytingin fer at forða fjølmiðlum í sínum arbeiði. Hvat ger Kára P. Højgaard føran fyri at meta um tað?
Heldur enn at skerpa lógina um alment innlit, so eigur landsstýrið at víðka lógina, so hon fevnir um enn fleiri viðurskifti. Sosialurin hevur seinastu vikurnar roynt at fingið innlit í búroknskapir hjá feløgum, sum løgmaður hevur varðað av. Hetta eru feløg, sum – hóast løgmaður hevur noktað fyri tí – hava givið landskassanum tap og øðrum við.
Lógin um alment innlit hevur forðað Sosialinum at fáa innlit í hesi viðurskifti. Um støðan ikki var tann, at eitt av hesum feløgum hjá løgmanni hevði givið Sosialinum eitt tap upp á góðar 100.000 krónur, so var sannleikin ikki komin fram. So høvdu fólk hildið, at tað passaði sum løgmaður segði við Vágaportalin 30. mai og við Sosialin 1. juni, at í øllum førum TAKS ikki hevur mist pengar av hansara vinnuvirksemi.
Talan er í hesum føri um virksemið, sum verður endaliga avgreitt í Føroya Skiftirætti, meðan Kaj Leo Johannesen er Føroya Løgmaður.
Vit vóna sjálvsagt, at løgtingi ikki fremur hesa ætlaðu broyting hjá landsstýrinum, men heldur víðkar lógina. Vit undrast eisini á, at búroknskapir – uppgerðir hjá partafeløgum, sum eru farin á húsagang – ikki eru almennir, tá ársroknskapir annars eru almennir.
Og nú tá landsstýrið er farið í holt við mál sum hava við gjøgnumskygni at gera, so hevði tað sømt seg, at løgmaður og øll landsstýrisfólk gjørdu alment kunnugt øll síni áhugamál so sum partabrøv, nevndarsessir o. a., tey hava røkt. Tað hevur stóran týdning, at fólkið kann hava álit á politikarum – og at øll slík viðurskifti kring politikarar eru púra opin, so tey ikki skapa trúvirðistrupulleikar, so sum aktuella málið um løgmann er dømi um.
