Tað sigur Kaj Leo Holm Johannesen, løgmaður, tá vit spyrja hann, um hann fer at taka stig til at broyta lønarviðurskiftini hjá politikarum soleiðis, at fráfarin landsstýrisfólk, sum aftur taka sæti á tingi, ikki bæði fáa løn frá landsstýrinum og løgtinginum í senn.
Spurdur beinleiðis, um hann fer at leggja slíkt uppskot fyri tingið, sum kann spara skattgjaldarunum milliónir, er svarið hjá løgmanni púra greitt: Nei!
Sum hann sjálvur sigur, so hevur hann onnur og størri mál at arbeiða við. Soleiðis kann staðfesast, at løgmaður og tingfólk halda tað vera í fínasta ordan, at tey oyðsla soleiðis við almennum pengum.
Tað sum er serliga merkisvert við hesum er, at bæði Kári P. Højgaard og Kaj Leo Holm Johannsen hava fyrr lagt júst hetta uppskot fyri tingið við júst somu grundgeving, at tað líkist ongum, at landsstýrismenn, sum fara frá og taka við tingstarvinum aftur, fáa dupult løn í seks mánaðir.
Í lønarposanum hjá einum fráfarnum landsstýrismanni, sum tekur sæti aftur á tingi merkir tað, at teir fáa eina fjórðings millión krónur eyka!
Tað fær Kári P. Højgaard nú, og tað fær løgmaður eisini, tá hann fer úr landsstýrinum og aftur í tingið – eins og øll hini seks landsstýrisfólkini, verða tey vald á ting.
Vit kunnu soleiðis staðfesta, at Kári P. Højgaard og Kaj Leo Holm Johannesen høvdu persónligan áhuga í at broyta hesi viðurskfitini, tá tað vóru aðrar persónar, tá »gekk út yvir«. Men nú, tá tað sæst aftur á kontoini hjá Kára P. Højgaard og Kaj Leo Holm Johannesen persónliga, so hevur pípan fingið annað ljóð.
Hetta er enn eitt prógv fyri, at politikararnir ikki áttu at sloppið at gjørt av sínar egnu lønir. Tá teir tosa um at broyta lønarskipanina, so eru tað bara lótir. Bæði Kaj Leo Holm Johannesen og Kári P. Højgaard hildu hesa broyting verða neyðuga, tá Jørgen Niclasen, Annika Olsen og Jacob Vestergaard seinast fingu fjórðingsmillión í eykaløn. Men nú tá teir sjálvir hava vunnið sær rætindi til hesa órímuligu eykaløn, nú hevur pípan fingið annað ljóð.
Hetta er ikki óreiðiligt, tí teir gera sum lógin ásetur.
Men hetta er sera ódámligt og lítið álitisvekjandi!
ODDAGREIN: Vit Vilja hava dupulta løn!
