Vestmanna kommuna leggur aftur í ár dent á heilsu, og her eru øll boðin við.
- Frá hósdegnum 12. juni til og við fríggjadagin 20. juni skipar kommunan fyri ymiskum tiltøkum, har dentur verður lagdur á rørslu, sosiala samveru og umhvørvið.
Í Vestmanna vísa tey á, at kommunan er partur av átakinum hjá Fólkaheilsuráðnum, ABC fyri sálarliga heilsu.
Átakið byggir á tríggjar súlur fyri at fremja góða sálarheilsu - at vera virkin, at vera saman og at vera hugbundin.
- Í eina góða viku verða tit boðin til tiltøk, sum byggja undir hetta. Harumframt verður eisini varpað ljós á umhvørvið hesaferð.
Skipað verður fyri einum serligum endurnýtsluátaki í Skilagott.
- Her verður ein knúsari settur upp til elektronik, og har fólk á staðnum greiða frá, hvussu burðardygg og trygg niðurbróting av elektronikki fer fram.
Í Vestmanna verður eisini plantuumbýting í viðarlundini, og tú fært møguleika at læra at seyma pløgg úr endurnýtslutilfari.
- Av rørslutiltøkum verður alt frá dansi, dipping og venjingum til gongutúrar, verkstovur og fríspæl, har bæði ung sum eldri kunnu vera við.
Úr Vestmanna verður sagt, at øll tiltøk á umhvørvis-og rørsludøgunum eru ókeyps, samstundis sum øll tiltøkini eru almenn.
Á heimasíðuni - www.vestmanna.fo - sær fullfíggja skrá fyri umhvørvis-og rørsludagarnar, sum í eina viku verða í Vestmanna.
