Høgni Hoydal
Av mær ókendum orsøkum, so er ein mynd av undirritaða sett saman við eini mynd av løgmanni. Og í tekstinum verður enntá sagt, at eg skal hava gjørt eina líknandi avtalu við Miðflokkin í sambandi við málið um 266B.
Rokni við, at oddagreinaskrivarin veit - um minnið verður granskað - at hetta er skeivt og íspunnið. Og at hetta er ein rættiliga grov villa at leggja fram alment.
1. Undirritaði hevur ongantíð gjørt nakra avtalu við Miðflokkin um 266B. Hinvegin vóru tað tjóðveldisfólk, sum í tveimum førum løgdu málið um 266B fram, har tað seinnu ferð varð samtykt. Eg havi sum formaður í flokkinum í øllum hesum førum stuðlað, at málini hava verið løgd fram og havi atkvøtt fyri. Og eg havi staðið rimmarfast um, at tingfólk hava rætt og skulu verjast í at atkvøða eftir síni sannføring. Tað hevur eisini elvt til mikið stríð - og til, at næstformaðurin flokkinum tók seg úr flokkinum.
2. Tað hevur eisini verið ført fram alment, at Tjóðveldisflokkurin og Javnaðarflokkurin skuldu hava gjørt eina líknandi avtalu um at binda tingfólk í CHE-samgonguni. Tað er heldur ikki rætt. Jóannes Eidesgaard var løgmaður tá, og tit kunnu sjálvandi fáa tað váttað frá honum.
Undir samgongusamráðingunum tá vóru bæði mál um rættindi hjá samkyndum og um fosturtøku frammi - har m. a. Miðflokkurin vildi herða fosturtøkulóggávuna. Flokkarnir staðfestu, at tað fór ikki í eini slíkari samgongu at vera gjørligt at fáa semju um at leggja uppskot fram vegna samgonguna um hesi mál.
Men tað var gjørt fultkomiliga greitt, at tingfólk stóðu frítt at atkvøða fyri uppskotum, sum onnur løgdu fram í tinginum. Og tað er ongantíð og verður ikki vikið frá tí í Tjóðveldi.
Sostatt er tað skeivt og ógrundað, at tit nú seta meg við mynd og teksti at hava gjørt tað sama sum Kaj Leo Johannesen.
Á hesum grundarlagi fari eg vinarliga at biðja tykkum rætta hesar skeivu upplýsingar - og eftir mínum tykki sera órættvísu viðgerð av mínum persóni - á einum eins sjónligum stað og skeiva viðgerðin av mínum persóni og avgerðir hjá Tjóðveldi vórðu settar fram.
Bestu kvøður
