Ov lítið av rávøru

Á virkinum hjá Sandoy Sea­food í Skopun hevur verið støðugt arbeiði í fleiri ár, men í løtuni liggur virkið at kalla stilt.
- Vit hava havt virksemi á virki­num síðani 1997, og tað hev­ur sjálvandi gingið upp og nið­ur. Í fjør var talan um lítið hall, og tað var serliga seinna hálva av árinum, sum gjørdi hetta, sigur Marner Lisberg, sum er nevndarformaður í Sand­oy Seafood.
- Ársgongdin hevur vanliga veri­ð tann, at frá september og út í mai mánaða er nóg mik­ið av rávøru, og soleiðis hevur eisini verið hjá okkum. Tað merkir, at fyrra hálva av ári­num hevur fíggjað tað, sum seinna hálva kostar, og sol­ei­ðis hevur verið øll árini, sigur Marner Lisberg.

Rávørutrot
Marner Lisberg sigur, at ein av­bjóðing hjá einum slíkum virki er at fáa nóg mikið av rá­vøru.
- Tá vit byrjaðu í 1997 vóru fýra partrolarar heima­hoy­r­andi í oynni. Hvannhólmur varð seldur stutt eftir, og fyri nøkrum árum síðani vórðu Colum­bus og Nornagestur seldir. Soleiðis er tað nú bert Eystur­búgvin, sum er lokalur rávøru­veitari, og eg vil rósa teim­um fyri at hava verið ser­stak­liga loyalir mótvegis virki­num. Sjálvandi hava vit eisini keypt rávøru frá øðr­um skipum, men lokalir veitar­ar hava stóran týdning, tí sambandið millum og virk­ir er vorðið ein alt meira týð­andi partur.
- Eisini hoyra Rankin og Suðringur undir somu kon­sern sum Sandoy Seafood, og ein roynd hevur verið gjørd at lata hesar báðar pa­r­trola eftir upsa, men tað er ikki bara sum at siga tað. Par­troling eftir upsa hevur ging­ið skeiva vegin síðani sep­tem­ber í fjør. Í vár løgdu vit Rankan, og Suðringur hev­ur síðani verið til annan fiski­skap. Seinni hava vit roynt eftir makreli, og hóast roynd­ir eru gjørdar eftir upsa, so vísir hetta seg at vera sera trupult.
- Er tað soleiðis, at rávøru­veit­ar­arnir eru fáir, og lítið er til av fiski, so fært tú ein trupulleika sum fram­leiðslu­eind. Eisini hóast vit hava positivt rakstra­r­íkast fyri hvørt kilo av fiski. Eru saml­aðu nøgdirnar ov lítlar, so ber illa til at fáa raksturin at hanga saman. Tí hava vit valt at taka ein steðg í framleiðsluni, men vit arbeiða framvegis hart fyri at tryggja okkum nóg mikið av rávøru, sigur Marner Lis­berg.

Gulllaksur
Eitt nú vísir hann á, at royndir hava verið gjørdar við at virka gullaks, tá tann verk­tíð­in er í apríl og nakrar mán­að­ir fram, men hann vísir á, at hetta er ein sera trupul marknaður at koma inn á.
- Ein annar møguleiki er sjálv­andi at virka frystan fisk, og vit hava tosað við ALS um eina slíka skipan, men her hevur ALS ikki neyðugu lógarheimildina.
- Eg vil tó leggja dent á, at vit ongar ætlanir hava um at steingja virkið á Sandoynni. Tað er framvegis okkara vón, at vit kunnu tryggja eina støðuga rávørutilgongd, og hetta er framvegis tað, sum vit arbeiða sera hart fyri, sigur Marner Lisberg.