Manchester United vann í dag á Bolton og 37-ára gamli Paul Scholes var millum málskjúttarnar. Tottenham fekk bara javnt, meðan Chelsea vann tepurt á Stamford Bridge. Liverpool spældi á sjeynda sinni javnleik á heimavølli.
Ongin er longur í iva um, at Paul Scholes hevur funnið fótbóltsskógvarnar framaftur. Í dag legði hann Manchester United á odda í dystinum á Old Trafford móti Bolton. Miðvallarin, sum í fjør gavst, byrjaði á miðvøllinum hjá verandi meistaraliðnum.
Undan leiðslu málinum brendi Wayne Rooney brotsspark. Í seinna hálvleiki slerdu Danny Welbeck og Michael Carrick sigurin fastan. Manchester United hevur nú saman við Manchester City 48 stig í oddinum. Manchester City spælir mánakvøldið móti Wigan.
Tottenham misti tvey stig í oddastríðnum, tá teir á White Hard Lane bara fingu javnleik móti Wolverhampton. Steven Fletcher legði Wolverhampton á odda um miðjan fyrra hálvleik. Luka Modric javnaði tíðliga í seinna hálvleiki til endaliga úrslitið 1-1. Tottenham er nú tvey stig aftanfyri Manchester liðini.
Chelsea vann ein kærkomnan sigur á Stamford Bridge móti Sunderland. Frank Lampard skoraði einsamalla aftaná eitt lítið korter. Á Anfield megnaði Liverpool ikki at bróta niður eina sterka Stoke verju. Hetta er sjeyndi javnleikurin hjá Liverpool á Anfield í hesum kappingarárinum.
Blackburn hevur havt tað trupult í ár, men í seinastuni er gongdin batnað nakað. Í dag vunnu meistararnir frá 1995 3-1 á Fulham á Ewood Park. Millum málskjúttarnar var Morten Gamst Pedersen. Blackburn er fyribils omanfyri niðurflytingarstrikuna, men bæði QPR og Wigan hava ein dyst til góðar.
Aston Villa og Everton deildu stigini á Villa Park, meðan Norwich vann á útivølli móti WBA.
Premier League:
Í dag:
Aston Villa Everton 1-1
Blackburn Fulham 3-1
Chelsea Sunderland 1-0
Liverpool Stoke 0-0
Manchester United Bolton 3-0
Tottenham Wolverhampton 1-1
WBA Norwich 1-2
Sunnudagin:
Newcastle QPR (13:30)
Swansea Arsenal (16:00)
Mánadagin:
Wigan Manchester City (20:00)
