28 ára gamli Hans Eiler Hammer verður nýggjur sóknarprestur í Norðoya vestara prestagjaldi.
Hans Eiler Hammer hevur tikið gudfrøðisútbúgvingina í Noregi. Hann varð liðugur á Meinigheitsfakultetinum í Oslo 29. apríl í ár eftir lestur í sjey ár. Sóknarprestastarvið í Norðoya vestara prestagjaldi varð tað fyrsta hann søkti, og starvið fekk hann.
Hans Eiler verður prestvígdur í morgin í Dómkirkjuni. Hans Jacob Joensen, biskupur hevur sjálva vígsluna. Dómprósturin, Bjarni Bæk, tekur eisini lut í gudstænastuni. Teir flestu av hinum prestunum í landinum verða eisini við til gudstænstuna.
Hósdagin var Hans Eiler til tað sokallaðu bisparoyndina. Í sjálvum sær er hetta ikki ein roynd, men meir ein samtala, so biskupur kann kenna seg vísan í kunnleikastøðnum hjá honum, sum skal prestvígast. Hans Eiler fekk eisini kallbrævið og skrivaði undir prestalyftið.
Byrjar 1. juli
Hans Eiler hevur búð bæði á Tvøroyri, á Nesi og eisini eina tíð í Klaksvík.
Hann er giftur við Lindu, ið er frá Kristiansand í Noregi, og saman eiga tey børnini Hans Martin og Helena Charlotte.
Hans Eiler skal byrja í sóknarprestastarvinum 1. juli, og tá flytir familian eisini inn í prestagarðin á Ziskatrøð, har Erland Beeder hevur búð, meðan hann hevur røkt embætið eftir Bøgesvang.
Innsettur
í Christianskirkjuni
Ikki er avgjørt enn, nær sjálv innsetanin verður í Christianskirkjuni í Klaksvík. Men annaðhvørt verður tað 28. juni ella 5. juli. Tá fer dómprósturin at taka lut, og Hans Eiler sleppir sjálvur at prædika.
