Í dag verður skipað fyri kravgongu, har kravt verður, at politiska skipanin dagførir fosturtøkulóggávuna. Stigtakararnir vilja hava politisku skipanina at tryggja rættin hjá kvinnum at »avgera um egið lív, kropp og nøring«, sum stigtakararnir siga.

Men hetta er ikki fyrstu ferð, at eitt tiltak verður fyriskipað um fosturtøku. Tann 14. apríl í ár skipaði Føroya Pro Vita saman við øðrum fyri tiltakinum »Standa fyri lívi«, sum handlaði um at vísa sín stuðul til ófødda barnið. At verja ófødda barnið er høvuðsmálið hjá felagsskapinum Føroya Pro Vita, og tí eru tey ímóti fosturtøku og stuðla harvið ikki hesum tiltakinum, sum verður fríggjadagin.

Rebekka Fuglø Poulsen er forkvinna í Føroya Pro Vita, og hon sigur soleiðis í samrøðu við Sosialin:

– Eini 2000-3000 fólk møttu upp til okkara tiltak í apríl og vístu sín stuðul til ta ófødda barnið. Nú verður sokallað kravgonga um kropsligt sjálvræði hjá kvinnum, sum skal tryggja teimum rættin at fáa fosturtøku. Vit mugu skilja, at barnið og kvinnan hava júst sama virði, sigur hon, spurd hvat Føroya Pro Vita heldur um hesa kravgongu.

– Tað er í lagi at brúka sína demokratisku ávirkan á ymiskan hátt, men kvinnur í Føroyum hava longu kropsligt sjálvræði, so tí undrist eg á eina kravgongu um júst hetta. 

Les samrøðu við stigtakararnar av kravgonguni her.

Les longri samrøðu við forkvinnuna í Føroya Pro Vita í Sosialinum, sum er komin út í sølubúðirnar. Eisini práta vit við stigtakararnar av kravgonguni, sum verður í dag.