Nú heystið er komið, og uttandura virksemið undir Bryggjubakka er avmarkað, verða pullartarnir gjørdir óvirknir fyri veturin.
Hesum boðar Tórshavnar kommuna frá í dag. Talan er um somu pullertar, sum fingu ógvuliga nógv uppmerksemi í summar, tá Mortan Johannesen, fiskasølumaður í Vágsbotni, gjørdi vart við, at pullertarnir órógva søluna hjá honum.
Men nú koma pullertarnir í øllum førum ikki at forða ella avmarka nakrari sølu í vetur, tí pullertarnir verða sum sagt gjørdir óvírknir.
Samstundis boðar kommunan frá, at ikki longur er loyvt at seta bilin á bryggjuni framman fyri Kaffihúsið og Umami. Hetta skal vera fyri at fáa fleiri fólk og færri bilar at ferðast Undir Bryggjubakka, og er hetta ein liður í arbeiðinum at hugna um undir Bryggjubakka.
