Tað er helst ikki at ognum, at potentiali í føroyingum er so gott til inniróður. Gamla kappróðrarmentanin í siðbundna føroyska kappróðrarbátinum er uttan iva orsøkin til, at tað liggur so væl fyri hjá føroyingum at gera um seg innan hesa ítróttargrein. Og sjálvandi skulu vit gera okkum dælt av hesum. Her hava vit eina einstaklingsítróttargrein, har nógvir føroyingar kunnu gera seg galdandi. Tí eiga vit sjálvani at taka kjansin, meðan hann er har.
Innan svimjing hava vit Pál Joensen, sum sjálvsagt eigur at fáa bestu umstøður. Innan fótbóltin hava A landsliðið hjá monnum, sum – hóast løku úrslitini – hevur gjørt sera stóran mun ítróttarliga og verið ein fram úr ambassadørur fyri Føroyar.
Sambært venjaranum hjá Torsteini, Kári Brattaberg, so kundu Føroyar verið ein suveren rógvitjóð.
– Tað er ein heilur hópur av ungum føroyingum, sum eru stór talent innan innandurarógving. Tað eru fleiri, sum kundu komið heilt langt, um tey fingu møguleika at royna seg uttanlands. Men Tað er dýrt at fara avstað – ferðaseðilin og uppihaldið fyri rógvara og venjara ella hjálpara er ikki bíligt, so tað eru uttan iva mong, sum setast aftur av fíggjarligum ávum. Og tað er stórt spell, sigur hann í grein her í blaðnum í dag.
Vit kunnu bara geva honum rætt. Tað er hugstoytt, at kostnaðurin av ferðini uttanlands skal vera orsøkin til, at í hesum føri ítróttarfólk setast aftur. Hinvegin kunnu vit staðfesta, at vit búgva í einum oyggjalandi mitt í Atlantshavi, men ráð er kortini fyri tí.
Landsstýrismaðurin, ið varðar av økinum, hevur sagt, at landið skal tjóðartaka tjóðarflogfelagið aftur, og løgmaður hevur sagt, at øktur ríkisstuðul úr Danmark millum annað skal brúkast til bíligari flogferðaseðlar við Atlantsflog.
Hóast laka trúvirði í hesum útsøgnum, so er hetta eitt mál, sum landsins myndugleika mugu gera nakað við, so ikki bara ítróttarfólk, men eisini eitt nú tónleikarar kunnu sleppa uttanlands at spenna veingirnar.
Verða hesi fólk ikki stimbrað, so tey sleppa uttanlands at royna seg, so kann alt gera tað sama.
Men er ein vilji, so er eisini ein loysn!
