Robert McBirnie, ið fylti 80 ár mikudagin, er av kendastu tónleikarum og undirhaldarum í Føroyum. 

Í sekstiárunum var hann við til at leggja lunnar undir nútímans rock- og poptónleik í Føroyum, m.a. sum frontmaður í The Faroe Boys. Seinni vóru tað Robert, Jákup og Ólavur, og síðani Robert og Vinmenn. Samstundis skemtaðist og undirhelt Robert eisini.

Robert tók læraraprógv á Føroya Læraraskúla í 1967. Var síðani lærari í Klaksvík og í Havn. Í 1969 fór hann í lærarastarv í Vági, heimbygdini. Her var hann til 1985, tá hann fór eitt ár á skeið í Danmark. Heimkomin, í 1988, fór hann í starv á Venjingarskúlanum í Havn, og fekst eisini við barnaútvarp.

Leygarkvøldið verður gallakvøld í Vági, Robert til heiðurs. Har verður Hilmar Jan Hansen borðstjóri, og umframt røður og heilsanir, so fara tónleikarar at syngja sangir, sum Robert hevur sungið og innspælt á tónleikaleið síni. Á pall fara Evi Tausen, Ingi Poulsen, Hjalmar Magnussen, Dagfinn Olsen, Rúni í Lágabø, Gudmund Larsen og Petur Bærentsen. Og óivað fer Robert eisini á pall, bæði sum skemtari saman við Hilmari Jan, og saman við tónleikarunum.

Atgongumerki til heiðurskvøldið í VB-húsium í Vági leygarkvøldið 11. november fáast í Miðlatúni í Vági og á billett.fo til mánadagin 6. november.