ÍF-Fleyr a 0-2
(15-21, 15-21, 15-21, 11-21)
Í seinastu viku fekk føroyska flogbóltslandskappingin tilgongd av tveimum útlendskum leikarum. Báðir eru komnir til Føroya, sum bæði venjari og leikari, og felags fyri teir báðar er, at teir koma eystaneftir. Ilic úr Jugoslavia og Romica úr Rumenia.
Um vikuskiftið fóru teir báðir so til verka, og saman við hinum leikarunum í Fleyr, spældi Romica móti ÍF á Kambsdali.
Sum nýggjur maður valdi Romica, sum vísiligt er, at byrja á bonkinum. Hann hevði bara vant saman við nýggju liðfeløgum sínum eina ferð, og tá hann samstundis ikki hevur vant so nógv seinastu mánaðirnar, er formurin farin eitt sindur av lagi.
Stórur munur á liðunum
Sum vit hava nevnt fleiri ferðir, so eru meistararnir rá í fjør mestsum hamskifti. Lítið veiggj er í teimum í ár sammett við seinasta ár, og tað ræður mest um hjá teimum at finna nýggja støðið hjá liðnum.
Avrikini higartil í ár hava verið misjøvn, og dysturin leygardagin var í so máta ein av teimum veikaru. Hann varð taptur ruddiliga, og orsøkin var heilt einfalt, at liðið hinumegin netið var so nógv betri, at har var einki at gera.
Fleyr vann 2-0 og øll fýra settini fóru til Havnar. Trý tey fyrstu við settmuninum 21-15 og tað seinasta 21-11, so talan var um greiðan mun.
Spælið hjá ÍF var misjavnt, og trupult var hjá teimum at fáa nakað skipað spæl. Bjarni Joensen hevði ikki so nógv at arbeiða við, og tað hann fekk var grýtt út á kantin til Kenneth Neshamar, sum ikki er nakar ársungi í flogbóltshøpi.
Hann hevði kortini trupult at vinna ígjøgnum verjuna hjá Fleyr, sum var støðug henda dagin, har serliga Steinar Eirikstoft skaraði framúr.
Steinar spældi á fyrsta sinni í meistaradeildini í fjør, men longu nú spælir hann sum ein gamal revur til tíðir.
Pascu er spennandi spælari
Í seinna hálvleiki helt spælandi venjarin hjá Fleyr, at nú mundi tíðin vera komin, at hann skuldi á vøllin at vísa sín flogbóltskunnleika. Hann kom inn fyri Janus, og sum skilst á brøgdum, so verður tað eftir øllum at døma plássi á miðjuni hann skal spæla seinni í kappingarárinum, tí Janus stingur í sekkin og fer til Danmarkar eftir nýggjár.
Hóast Pascu Romica ikki enn er komin í venjing, so sigur Klæmint Isaksen, at tað sást heilt týðuliga, at maðurin er vanur at spæla flogbólt á høgum stigi.
- Hann gjørdi ikki nógv um seg, men tað sæst, at hann veit hvussu ein skal gera. Vit sóu lítið til hann í álopinum, men í verjuni vísti hann sínar dygdir. Hann dugir væl at plasera seg í mun til bóltin og blokkin, og hóast hann er langur, so fekk hann eisini onkran torføran bólt upp aftur áðrenn hann fór í gólvið. So tað sær bara heilt spennandi út, sigur Klæmint Isaksen, sum í fjør var leikandi venjari hjá Fleyr.
Um rumenin fer at spæla so nógv í byrjanini veit Klæmint ikki, men tað fer hann nokk sjálvur at taka avgerð um.
- Tað hevur gingið gott hjá liðnum í ár og tí er spurningurin um hann fer at gera broytingar nú, sigur Klæmint.
Hvar á vøllinum nýggi leikarin fer at leika er heldur ikki avgjørt, men tað verður eftir øllum at døma á miðjuni. Hann hevur leikt miðjumaður fyrr, umframt at hann hevur leikt sum hevari eisini. Tó verður tað neyvan hetta plássið hann fer at leika á, sigur Klæmint.
- Vit eru betri fyri við hevarum enn við miðjuspælarum, og tí verður tað nokk har hann fer at spæla, sigur Klæmint.
Ejdesgaard afturíaftur
Annars sær út til, at Fleyr fær tilgongd frá enn einum leikara. Ella skal tað kallast afturgongd, um tað er nakað sum eitur so.
Talan er um Jóannes Ejdesgaard, sum ivi var um fór at spæla í ár. Hann hevur ikki vant higartil í ár, men í hesi vikuni var hann aftur at síggja saman við fyrsta liðið, og kemur við á liðið, so er eingin loyna, at Fleyr er heilt væl fyri í ár.
- Eg rokni kortini ikki við, at hann verður klárur áðrenn jól, sigur Klæmint Isaksen at enda.
