Ronaldo fekk ikki málið – men ein sigur

HM 2022: Portugal er víðari og tað er hørð kapping um annað plássið í bólkinum

Mynd: (Scanpix) Cristiano Ronaldo

Portugal vann á Uruguay og er víðari úr bólkaspælinum. Uruguay skal nú vinna seinasta dystin í bólkaspælinum, fyri at hava nakran møguleika, at koma víðari. Gana feldi Suðurkorea og kann helst við javnleiki tryggja sær víðari luttøku, um ikkki Suðurkorea vinnur á Portugal.

 

Portugal – Uruguay 2-0 (0-0)

 

1-0 Bruno Fernandes, 54

 

2-0 Bruno Fernandes, 90+3 br

 

Tað var lagt upp til ein spennandi dyst í gjárkvøldið, tá tveir av minni avbjóðarunum til HM-steypið møttust. Portugal við Cristiano Ronaldo á odda móti Uruguay við Edinson Cavani og Luis Suarez.

 

Portugal var omaná, meðan Uruguay hevði ilt við at fáa spælið at hanga saman. Tað gekk millum annað illa at fáa bóltin fram til Darwin Nunez í álopinum. Tíggju minuttir inn í seinna hálvleik kom hol á.

 

Bruno Fernandes sendi innlegg innfyri, sum Cristiano Ronaldo var ein sentimetur frá at raka. Hetta órógivaði málverjan og bólturin endaði í málinum. Cristiano Ronaldo royndi sum best at fegnast sum ein málskjútti, men FIFA hevur staðfest, at Bruno Fernandes verður skráttur sum málskjútti.

 

Í yvirtíðini staðfesti sami Bruno Fernandes sigurin við brotssparki til 2-0. Her var stór ósemja um brotssparki, men eftir ein túr til VAR-skermin valdi dómarin at bríksla fyri brotssparki. Portugal er nú víðari.

 

Suðurkorea – Gana 2-3 (0-2)

 

M. Salisu, 24

 

M. Kudus, 34

 

J. Gue-sung, 58

 

J. Gue-sung, 61

 

M. Kudus, 68

 

Tað var dramatikkur og mál í hesi uppgerðini. Gana kom á odda 2-0 í fyrra hálvleiki, men í seinna hálvleiki javnaði Suðurkora, áðrenn Mohammed Kudus skoraði fyri aðru ferð. Miðvallarin hjá Ajax er eitt navn at halda eyguni við.

 

Bólkur H:

 

1: Portugal 6

 

2: Gana 3

 

3: Suðurkorea 1

 

4: Uruguay 1

 

Mynd: (Scanpix) Cristiano Ronaldo