Í gjár segði Kreml-talsmaðurin, Dmitrij Peskov, at russiski herurin eftir langt um leingi hevði tikið ukrainska býin, Pokrovsk í Donetsk-regiónini.
Sambært útlendskum miðlum, hava russar fleiri ferðir áður hildið upp á, at býurin er fallin, men Ukraina hevur sagt, at hetta er ikki so.
Í morgun siga ukrainsku myndugleikarnir, at herurin hjá teimum framvegis hevur ræðið í pørtum av býnum.
Reuters hevur havt samband við ukrainskar deildir, sum stríðast í Pokrovsk, og her verður sagt, at deildirnar fremja álop á russiskar deildir í syðra parti av býnum.
Útsagnirnar úr Ukraina koma eftir, at russiski forsetin, Vladimir Putin, hevur fingið at vita, at Pokrovsk er fallin í russiskar hendur.
Eygleiðarar vísa á, at um russar fáa fult tamarhald á Pokrovsk, kann hetta slóða fyri russiskari framtøku til aðrar býir í Donetsk, sum framvegis eru undir ukrainskum ræði.
