Eitt russiskt dronuálop hevur elvt til eld í einum íbúðarbygning í vestara parti av høvuðsstaðnum í Ukraina, Kiev, í nátt.
Í minsta lagi níggju fólk eru særd. Millum tey særdu er ein 11 ára gomul genta.
Tað sigur borgarstjórin í býnum, Vitali Klitschko, á boðtænastuni Telegram.
Sambært borgarstjóranum vóru tað vraklutir frá eini niðurskotnari dronu, sum festu eld í íbúðarbygningin, sum liggur í Solomjanskyj-økinum.
- Higartil hava níggju fólk fingið skaða, skrivar hann.
- Tey hava øll verið viðgjørd av læknum á staðnum.
Hernaðarfyrisitingin í Kiev sendi út eina mynd, sum vísir eld, sum kemur úr eini íbúð í einum íbúðarbygningi.
Sambært hernaðarfyrisitingini er enn ein eldur kyknaður í einum fyrisitingarbygningi í fleiri hæddum, sum eisini liggur í Solomjanskyj-økinum.
Ongar fráboðanir eru um deyðsfall ella skaða í sambandi við eldsbrunan í umsitingarbygninginum.
Loftálopini byrjaðu mikunáttina umleið klokkan 02:30 bæði í Kiev, økinum rundan um og í eystara parti av Ukraina.
Í nátt hava fleiri spreingingar verið at hoyrt yvir høvuðsstaðnum.
Sambært loftverjuni í Ukraina eru 33 av 62 niðurskotnum dronum skotnar niður yvir landinum mikunáttina.
Russiska verjumálaráðið sigur í gjár, at loftverjan í landinum hevur skotið 23 ukrainskar dronur niður yvir vestaru økini í Russlandi í nátt.
Sjey av dronunum skulu vera skotnar niður yvir Rostov-økinum, fimm yvir Kursk, fýra yvir Smolensk, meðan hinar dronurnar skulu vera skotnar niður yvir Oryol-, Bryansk- og Belgorod-økjunum, upplýsir ráðið á Telegram.
Ongar fráboðanir eru um deyð ella skaða í sambandi við ukrainsku dronuálopið í Russlandi í gjárkvøldið.

Ritzau/Reuters