Forsetin í Moldova, Maia Sandu, sigur, at Russland í álopunum á Ukraina síðstu nátt eisini gjørdi seg inn á loftrúmið yvir Moldova.
Hon sigur, at russiskar dronur, sum vóru ávegis móti Ukraina, eisini vóru í loftrúminum hjá Moldova.
- Ávegis at drepa sivilfólk í Ukraina vóru russiskar dronur enn einaferð í okkara loftrúmi, sum eina løtu mátti steingjast, sigur Maia Sandu.
Neyðugt var at avlýsa bæði fráferðir og komur í høvuðsstaðnum í Moldona, Chisinau.
- Hetta førdi til seinkingar og umleggingar av flogferðsluni, eitt nú til grannalandið, Rumenia, vita miðlar í Moldova at siga.
Forsetin í Moldova sigur, at landið fordømir álopini á grannalandið, Ukraina og leggur aftrat, at Moldova veitir Ukraina sín stuðul.
At kalla hvørja nátt sendir Russland dronur og rakettir móti Ukraina, og Russland hevur í sínum álopum á Ukraina ferð eftir ferð gjørt seg inn á loftrúmið hjá grannalondum.
