Sambært talsmanninum hjá Vladimir Putin, forseta, hevur Russland nú broytt støðu, soleiðis at málið hjá Russlandi ikki longur er at reka ukrainska forsetan, Volodymyr Zelenskyj, frá valdinum.
Tá Russland leyp á Ukraina, var eitt av málunum at fáa forseta landsins frá valdinum, men nú er hetta eftir øllum at døma ikki eitt mál longur.
Volodymyr Zelenskyj varð verandi í Kyiv, tá Russland leyp á Ukraina. Hetta gjørdi, at ótti var um lívið hjá forsetanum. Nú heldur Russland uppá, at forsetin ikki er eitt mál longur við krígnum.
- Tað er ikki okkara mál, at "spesialoperatiónin" skal broyta stjórnina í Ukraina, sigur Kreml-talsmaðurin, Dmitrij Peskov, nú sambært Sky News.
Hetta er púrasta tað øvuta av tí, sum russiski forsetin, Vladimir Putin, hevur sagt í sjónvarpsrøðu. Tá mælti hann nevniliga til, at ukrainskir hermenn tóku stjórnina í Ukraina av ræði.
- Tað verður einfaldari fyri okkum at semjast, um tit taka valdið í egnar hendur, segði russiski forsetin.