Fyrsta liðið, sum um vikuskiftið skal spæla hálvfinalu í kappingini um løgmanssteypið er funnið. Tað er Víkingur, sum í kvøld á heimavøllinum í Sarpugerði vann 1-0 ímóti TB.
Talan var um javna og tætta uppgerð. Einasta málið skoraði landsliðsspælarin Sølvi Vatnhamar við brotssparki fimm minuttir undan leikloki.
Jákup Johansen fór um koll, og brotsspark varð dømt ímóti Rógva Joensen. Eiler Rasmussen bríkslaði fyri brotssparki, men tvøramenn vóru øgiliga misnøgdir við brotssparksdómin. Tað vístu teir, áðrenn Sølvi skoraði, og tað vístu teir dómaranum, tá ið hann hevði bríkslað av og dysturin var liðugur.
Sølvi Vatnhamar hevur níggju ferðir higartil í ár roynt seg við brotssparki, og hann hevur allar ferðirnar sett bóltin í málið.
Talan var ikki um so nógvar upplagdar málmøguleikar. Flestu royndirnar hjá TB hevði Mark Kongstedt, sum ta einu ferðina sendi bóltin í tvørtræið aftanfyri Elias Fagrá.
Víkingur skal í hálvfinaluni spæla ímóti vinnaranum av dystinum millum B36 og AB. Tann dysturin verður í Sarpugerði.
Víkingur – TB 1-0 (0-0)
Dómari: Eiler Rasmussen
1-0: Sølvi Vatnhamar br 85.
Víkingur: Elias Fagrá – Ari Olsen, Noah Mneney, Gunnar Vatnhamar, Bergur Gregersen – Olaf Bárðarson (Andreas Lava Olsen, 69.), Geza David Turi, Arnbjørn Svensson, Jákup Johansen – Sølvi Vatnhamar, Finnur Justinussen
Gult kort: Noah Mneney
Venjari: Jóhan Petur Poulsen
TB: Frederik Mehder – Jens Erik Bruhn, Aron Sørensen, Ndende Adama Guéye, Samudeen Musah – Dánjal Godtfred, Rógvi Joensen – Andreas Midjord, Mark Kongstedt, Einar Thorsteinsson – Filip Obadovic
Gult kort: Rógvi Joensen, Mark Kongstedt, Filip Obadovic, Andreas Midjord
Venjari: Michael Winter
