Liðið hjá Óla Mittún og Ísak Vedelsbøl, Sävehof spældi í kvøld fyrru áttandapartsfinaluna í svensku steypakappingini.
Á útivølli í Malmø eydnaðist tað Sävehof at vinna tepran 36-34 sigur. Í steðginum var Sävehof á odda 20-18.
Óli var við fimm málum millum næstbestu málskjúttarnar hjá Sävehof.
Aftaná at hava møtt trimum liðum úr lægri deild í innleiðandi bólkaspælinum fekk Sävehof á fyrsta sinni góða mótstøðu í steypakappingini.
Seinna áttandapartsfinalan verður leikt í Partille komandi leygardag klokkan 14.
Systkinabarn Óla, Elias Ellefsen á Skipagøtu megnaði at vinna steypakappingina við Sävehof. Tað hevur Óli til góðar, enn.
