Samgongan ætlar at herða útlendingapolitikkin og seta greiðari krøv til fólk, sum flyta til Føroya.
Tað sigur Beinir Johannesen, løgmaður, í samrøðu við Sosialin.
– Hvussu verður tað gjørt?
Løgmaður vísir á, at arbeitt verður framvegis við einari nýggjari útlendingalóg. Men samgongan ætlar ikki at bíða eftir henni.
– Vit fara fyrst at fremja nøkur átøk her og nú.
Fyrsta broytingin verður, at arbeiðsmegi úr útlondum ikki fær møguleika at fáa familjuna til Føroya beinanvegin.
– Vit ætla, at tað í minsta lagi skulu ganga trý ár, áðrenn samfylgjandi familja kann flyta til Føroya.
Harumframt verður krav sett um reina revsiváttan.
– Hetta eru tvey mál, sum vit vilja fremja beinanvegin, sigur Beinir Johannesen.
Samstundis heldur arbeiðið fram við einari nýggjari útlendingalóg.
Ein partur av henni verður ein positivlisti yvir lond, haðani Føroyar ynskja at fáa arbeiðsmegi.
– Vit fara eisini at seta størri krøv til málførleika og integratión.
Løgmaður vísir á, at samgongan leggur stóran dent á, at fólk, sum flyta til Føroya, læra málið og gerast partur av føroyska samfelagnum.
Sosialurin fæst í leysasølu kring landið. Haldarar kunnu lesa blaðið á sos.fo
