Dómur er í dag fallin í málinum, har Felagið Føroyskir Sjúkrarøktarfrøðingar stevndu Sands kommunu og Økistænastuni fyri Sandoyar sýslu eftir uppsagnarløn til leiðaran fyri tilhaldið, Hugnan.
Felagið Føroyskir Sjúkrarøktarfrøðingar kravdi uppsagnarløn í seks mánaðir.
Sands kommuna kravdi frídøming ímóti at rinda 27.000 krónur. Peningurin var fyri frítíðarløn fyri 2015 og lønarmun í uppsagnartíðini millum gamla starvið og nýggja starvið í Økistænastuni.
Økistænastan fyri Sandoyar sýslu kravdi frídøming.
Dómurin, sum er sagdur í dag, gekk Sands kommunu og Økistænastuni á møti, og skal Sands kommuna gjalda tær 27.000 krónurnar, meðan Økistænastan einki skal gjalda.
Felagið Føroyskir Sjúkrarøktarfrøðingar skal gjalda sakarmálskostnaðin, 20.000 krónur til Sands kommunu og 20.000 krónur til Økistænastuna fyri Sandoyar sýslu.
