Mjølnir-kappingin:
Í oktober mánað síðsta ár blivu fyrstu steypafinalistarnir í flogbólti funnir, tá FK-kappingin var á skránni í Havn. Hesi kapping skipaði flogbóltsfelagið Fleyr fyri, og tá kappingin var liðug, var greitt, at KÍF hjá kvinnum og Mjølnir hjá monnum høvdu tryggjað sær pláss í steypafinalunum, sum vera á skránni tann 17. februar. KÍF vann nevniliga kappingina í meistaradeildini hjá kvinnum, meðan Mjølnir vann kappingina í meistaradeildini hjá monnum.
Um vikuskiftið løgdu eldru deildirnar so til brots í Klaksvík, har Mjølnir-kappingin var á skránni. Her skuldu liðini í bestu deildunum kappast um seinastu plássini í steypafinalunum.
KÍF sterkast á kvinnusíðuni
Tá ið FK-kappingin var á skránni í Havn, tá vann KÍF bæði 1. deild og 2. deild hjá kvinnum. Hetta er kanska heldur ikki so merkisvert, tí í landskappingini liggur KÍF á odda í hesum báðum deildum, har liðini hava vunnið allar sínar dystir.
Mjølnir-kappingin bleiv heldur einki undantak í so máta. Í 1. deild var bara ein bólkur, har liðini vóru KÍF, SÍ, Mjølnir og Fleyr. Her gjørdi KÍF bart. Kvinnurnar úr Kollafirði vunnu allar sínar dystir 2-0, men dysturin ímóti Fleyr bleiv tó rættiliga spennandi, og her var ikki so stórur munur á liðunum.
Í 2. deild hjá kvinnum var kappingin skipað heldur øðrvísi. Her vóru tríggir bólkar, har vinnararnir úr hvørjum bólki komu víðari til endaspælið. Tey liðini, sum ikki vunnu sínar bólkar, høvdu tó møguleika at røkka endaspælinum í hesi deildini, tí eitt av hinum liðunum slapp eisini við í endaspælið.
Eisini í hesi deildini eydnaðist KÍF a at vinna kappingina. Tær vunnu allar sínar innleiðandi dystir 2-0, og bæði í millumumfarinum og í hálvfinaluni eydnaðist teimum eisini at vinna tryggar 2-0 sigrar. Í finaluni vunnu tær aftur, men hesaferð bleiv úrslitið 2-1 í dystinum ímóti Mjølnir a.
Fleyr og FS sigraðu hjá monnum
Í 1. deild hjá monnum var heldur eingin ivi um úrslitið. Her vara bara ein bólkar, har liðini vóru Mjølnir, TB, SÍ og Fleyr. Fleyr var tað sterkasta liðið, og teir vunnu allar sínar dystir rættiliga trygt.
Í fyrstu dystunum vunnu teir tryggar sigrar á SÍ og TB, men triðja dysturin bleiv heldur meir spennandi, tá teir møttu Mjølnir, sum eisini hevði vunnið sínar fyrstu tveir dystir. Fleyr var tó tað sterkara liðið, og teir vunnu eisini henda dystin 2-0. Sostatt vann Fleyr allar sínar dystir 2-0.
Í 2. deild hjá monnum var tað a liðið hjá Føroya Studentaskúla, sum vann kappingina. Teir vóru komnir í innleiðandi bólk saman við ÍF, Fleyr b og Nøvuni b, og her vann liðið hjá Føroya Studentaskúla allar dystirnar 2-0. Í hálvfinaluni møttu teir Mjølnir a, og enn einaferð vunnu teir ein sannførandi 2-0 sigur.
Í finaluni møttu teir Fleyr a, og hesin dysturin gjørdist sera spennandi. At enda vann ligið hjá Føroya Studentaskúla 2-0, og sostatt vunnu teir kappingina í 2. deild hjá monnum.
ÍF og Dráttur í steypafinaluna
Í meistaradeildini hjá kvinnum skuldu seks lið kappast um síðsta plássið í steypafinaluni. Seks lið, tí KÍF longu hevði tryggjað sær pláss í finaluni, samstundis sum Fleyr í steypakappingini spælir saman við liðunum í meistaradeildini hjá kvinnum.
Her vóru liðini býtt upp í tveir bólkar, har nr. 1 og nr. 2 úr hvørjum bólki fóru víðari til hálvfinalurnar. Tað eydnaðist hjá ÍF at vinna fyrsta bólkin frammanfyri SÍ og KÍF, og í øðrum bólki vann Dráttur frammanfyri Mjølnir, TB og Fleyr. Sostatt skuldi ÍF spæla ímóti Mjølni í aðrari hálvfinaluni, meðan hin hálvfinalan bleiv ein rein vágauppgerð, har Dráttur og SÍ brustu saman.
Í dystinum millum ÍF og Mjølnir eydnaðist ÍF at vinna 2-0 eftir tvey tøtt og sera spennandi sett. Í longdini gjørdist rutinan tó avgerðandi fyri ÍF, sum vann 25-23, 26-24. Hin hálvfinalan gjørdist enn meiri spennandi. Her eydnaðist tað hjá Drátti at vinna 2-1. Fyrsta sett vann Dráttu 25-18, meðan SÍ tók annað settið 18-25. So skuldi eitt avgerðandi 3. sett til, og hetta bleiv óvanliga spennandi. At enda vann Dráttur 20-18 í hesum settinum, og kvinnurnar hjá SÍ kunnu bert takka sær sjálvum fyri, at tær ikki komu í finaluna. Tær førdu nevniliga 10-2 í 3. setti, men Dráttur vísti ótrúliga góðan vilja at kempa seg innaftur í dystin.
Sostatt bleiv finalan ímillum Drátt og ÍF, og her vann Dráttur 3-2. Tær vunnu 1. sett 25-23, men so setti ÍF ferð á og vann næstu tvey settini 20-25 og 20-25. Nú sá ikki so gott út hjá Drátti, men enn einaferð vendu tær gongdini og vunnu síðsta tvey settini við settúrslitunum 25-20, 15-11. Harvið vunnu tær eisini Mjølnir-kappingina.
Hjá monnum var bara ein bólkur við fimm liðum. Kappingin var skipað á tann hátt, at tvey tey fremstu liðini í hesum bólkinum skuldu leika finalu dagin eftir. Her eydnaðist heldur óvæntað botnliðnum í meistaradeildini hjá monnum, SÍ, at vinna bólkin, meðan hørð kapping var um annað plássið. Her skuldu ÍF og Mjølnir leika síðsta dystin, og vinnarin av hesum dystinum skuldi møta SÍ í finaluni. Her eydnaðist ÍF at vinna 2-1 eftir ein sera tættan og spennandi dyst, og sostatt skuldu SÍ og ÍF møtast í finaluni.
SÍ legði hart út í finaluni, tá teir vunnu 1. sett 25-22, men eftir hetta var sum so eingin ivi um úrslitið. Síðstu trý settini vann ÍF trygt við settúrslitunum 21-25, 14-25, 20-25, og sostatt gjørdust teir vinnarar av Mjølnir-kappingini.
Nú er so greitt, hvørji mótstøðuliðini hjá KÍF og Mjølni vera í steypafinalunum tann 17. februar. Her skal KÍF leika ímóti Drátti í kvinnufinaluni, meðan Mjølnir og ÍF bresta saman í mansfinaluni, og so er bara at bíða við spenningi til tann 17. februar, tá steypavinnararnir í flogbólti vera kosnir.
