B36 er FM vinnari, og í dag verður FM fagnaður – bæði í Fuglafirði og í høvuðsstaðnum. FM steypið og gullkrónurnar verða handaðar í Fuglafirði um fýra tíðina, tá ið síðsta bríksl hevur verið millum ÍF og B36.
B36 ferðalagið verður stórt í Fuglafirði. Við gulli og steypi verður farið suður í høvuðsstaðin og á Vaglið, har kommunan fer at taka ímóti FM vinnarunum og ivaleyst nógvum B36 fjepparum.
Seinnapartin eigur HB heimavøll í Gundadali ímóti FC Suðuroy. Bæði liðini hava knívin á barkanum: HB sigur ber rætt til europeiska luttøku og 1,5 milliónir krónur við sær. FC Suðuroy hongur í klønum tráði, men tað er møguleiki fyri at bjarga sessinum í bestu deildini. Soleiðis verður tað, um FC Suðuroy vinnur, og um AB ikki fær stig á heimavølli ímóti NSÍ.
Um tað eydnast AB at vinna fulla úrtøku ímóti NSÍ, so er møguleiki fyri, at argjamenn, sum alt kappingarárið hava verið illa sperdir í botnstríðnum, kunnu lyfta seg upp um bæði TB og ÍF og vinna sætta plássið!
Um tað endar javnt í Gundadali, so flytur FC Suðuroy niður. Tað er góður møguleiki fyri, at HB vinnur fjórða plássið við javnleiki. Tað er tó treytað av, at KÍ ikki vinnur við seks málum ella fleiri á heimavølli ímóti EB/Streymi.
NSÍ og Víkingur kappast um silvurkrónurnar. Í tí kappingini er NSÍ eitt stig og fýra mál betri enn Víkingur. Bæði liðini skulu spæla á útivølli – NSÍ á Argjum og Víkingur á útivølli ímóti TB, sum hevur møguleika at taka sætta plássið frá ÍF.
27. umfar klokkan 14.00:
TB-Víkingur: Lars Müller
AB-NSÍ: Páll Augustinussen
HB-FC Suðuroy: Alex Troleis
ÍF-B36: Petur Reinert
KÍ-EB/Streymur: Eiler Rasmussen
Støðan undan 27. umfari
B36 58
NSÍ 51
Víkingur 50
HB 40
KÍ 38
ÍF 27
TB 26
AB 24
FC Suðuroy 22
EB/Streymur 11
