– Eg sigi einki. Vit fáa at síggja í morgin.
Tað sigur Hafsteinn Ægir Geirsson, tá hann verður spurdur um íslendska taktikkin í Suðuroynni, har annar harði dagurin á rað er á skránni í Statoil Kring Føroyar.
– Tað sigur seg sjálvt, at eg og liðið fyrst og fremst skulu verja okkara støðu, so tað er líkasum upp til aðrar, um teir ætla at leypa á. Men har eru nógvar brekkur, so fáa vit at síggja, sigur Hafsteinn.
Heldur ikki Gunnar Dahl-Olsen, sum í gjár var næstfremstur á mál og er á næstfremsta liðnum, vil siga nakað um, hvussu ætlanin er at súkkla seg til sigurs í Suðuroynni í dag.
– Nú høvdu vit ein harðan endaspurt á Glyvrum, so alt kann henda í Suðuroynni. Men tað verður ein heilt onnur kapping, tí har eru fleiri støð, har tað ber til at stinga av, sigur Gunnar.
– Í fjør var tað niðan úr Fámjin, at alt bleiv avgjørt, men har eru fleiri møguleikar. Torkil, Gudmundur og eg fara í øllum førum at gera okkara til, at vit kunnu vinna liðkappingina aftur í ár.
