Tá vit vitjaðu á Hellunum mánadagin í vikuni, hittu vit 85 ára gamla, Símun Hans Jacobsen. Tað var júst henda dagin, hann hevði føðingardag, og tískil kundu vit eisini ynskja honum tillukku við degnum.
Ættarbondini hjá Símun Hans í faðirættini eru í Saltnesi, og móðurættin er úr Syðradali á Kalsoynni, har hann eisini sleit sínar barnaskógvar.
- Eg var 21 ára gamal, tá eg kom til Hellurnar og Sonja, sum gjørdist kona mín, er uppvaksin á Hellunum. Vit eiga tveir dreingir og tvær gentur.
Hann sigur, at yngri sonurin býr á Skála, og hin eldri býr í Havn. Yngra dóttirin býr í Oyndarfirði, og hin eldra býr á Hellunum.
Børnini hjá Símun Hans og Sonju gingu í skúla bæði á Hellunum og í Oyndarfirði, og tá tey vóru 14, fóru tey út á Strendur.
- Tá vegurin kom, koyrdu børnini út á Strendur í framhaldsskúla við bussinum, sigur hann.
##med2##
Fekk hjartasteðg
Hóast Símun Hans ber aldur sera væl, og hann er lættur á fótum, fekk hann longu sum 58 ára gamal ein stóran skelk.
- Vit vóru á fjalli í Oyndarfirði, tá eg føldi mær ein knút fyri bringuni. Eg noyddist at leggja meg niður einar tvær ferðir, men royndi at ansa eftir, at eg ikki órógvaði seyðafylgið.
Tað, sum síðan hendi, kundi lættliga tikið lívið av manninum, sum tá var í bestu árum.
- Meðan eg lá her, fekk eg bæði blóðtøpp og hjartasteðg.
Tað var eitt guds undur, at maðurin yvirhøvur yvirlivdi.
- Súni Eliasen, sum tá sigldi við Magn-oljuskipinum, var eisini á fjalli henda dagin. Hann hevði júst verið á skeiði í lívbjargandi fyrstuhjálp, og yngri sonur okkara hjálpti til við fyrstuhjálpini.
Tað eydnaðist teimum at fáa lív í aftur Símun Hans, og tá hann raknaði við, kom sjúkrabilur eftir honum og koyrdi hann á Landssjúkrahúsið.
- Var Súni Eliasen ikki á fjalli henda dagin, hevði eg ikki yvirlivað, tí tað tók sjúkrabilinum ein tíma at koma fram.
Símun Hans sigur, at hann føldi seg rímiliga væl, tá hann vaknaði aftur, men tað var eingin ivi í hansara sál um, at hann skuldi undir læknahond.
- Eg lá á sjúkrahúsinum í nakrar dagar, og sjálvur helt eg, at eg kom rímiliga skjótt fyri meg aftur. Men, eg má viðganga, at tað tók sína – ja, eg vil siga rúma tíð - áðrenn eg veruliga orkaði tað sama aftur.
Um hetta mundið arbeiddi hann á Skála Skipasmiðju.
- Eg byrjaði á skipasmiðjuni í 1978, og eg var her í 28 ár – heilt til, at eg var fyltur 70.
Hann sigur, at Skála Skipasmiðja var eitt fantastiskt arbeiðspláss, og her arbeiddi hann í fyrsta lagi sum sveisari.
- Mær dámdi sera væl at sveisa, og vit bygdu hesi árini fleiri nýbygningar, sigur hann.
##med3##
Sigldi í 15 ár
Á yngri árum var Símun Hans eisini sjómaður og útróðrarmaður í eini 15 ár, og av hesum 15 árunum, hevði hann ábygdina av maskinarínum í eini 10 ár.
- Soleiðis var eg við 30-tonsaranum Glottanum, og í sínari tíð var eg eisini við sluppini, Ester, har vit royndu bæði við snellu og línu.
Í sínum arbeiðslívi, arbeiddi Símun Hans eisini hjá byggifelagnum, E. Pihl & Søn, og her var han eitt nú við til at byggja Norðskálatunnilin, sum kom í 1976 og Leynatunnilin, sum kom stutt eftir.
Tað var nakað eftir hesar tunnilsbyggingar, at Símun Hans fór at arbeiða á Skála Skipasmiðju.
Røktingarmaður
85 ára gamli maðurin á Hellunum hevur eisini verið røktingarmaður heilt síðan 1966, og hetta álitisstarv hevur hann framvegis.
- Tá eg arbeiddi á Skála Skipasmiðju, kundi eg fara í hagan um 05-tíðina á morgni, og klokkan 08 var eg á Skála til arbeiðis.
Símun Hans sigur, at tað er nógv broytt á Hellunum í hansara tíð, og nú er fólkatalið í bygdini fáment.
- Eg haldi, tað er hugnaligt at møta ferðafólki í bygdini, og um sumrarnar eru ofta útlendsk ferðafólk her og vitja.
Hann sigur seg hava hitt fólk úr nógvum ymiskum og fjarskotnum londum á Hellunum.
- Her hava verið fólk úr eitt nú Amerika, Italia, Spania, Grikkalandi og Týsklandi – bara fyri nevna nøkur av londunum.
Hann sigur, at hetta er alt blíð og fitt fólk.
- Sjálvandi er málið ein trupulleiki í samskiftinum, men her hevur verið roynt á ymiskan hátt at skilja tað ferðafólkini.
Hann sigur, at øll hesi fólk hava verið stakliga fyrikomandi.
- Tað er ein frægd at hava tey í bygdini teir dagarnar, tey eru her, sigur 85 ára gamli, Símun Hans Jacobsen.
