Í hesum døgum verður dúgliga kjakast um hvørt tað er rætt, at føroyskir tíðindaportalar leggja myndir av grindadrápi út.
Aðrastaðni á portalinum stendur at lesa, at ein grein um grindadrápið í Vági í gjár hevur sligið met á portalinum. Greinin Um 150 hval lagt beinini er lisin yvir 34.000 ferðir, og yvir
900 viðmerkingar eru til hesa greinina.
Fleiri føroyingar hava síðani ført fram her á portalinum, at tey halda tað vera skeivt, at tíðindaportalar leggja myndir av grindadrápi út til allan heimin at síggja og kritisera.
Men Eirikur Lindenskov, ábyrgdarblaðstjóri á portalinum og Sosialinum er als ikki samdur.
- Vit góðtaka grindadráp, og vit meina eisini, at vit gera tað á ein humanan hátt, og tað er tað, sum vit royna at greiða fólki frá. Og í 2012 ber ikki til at halda nakað loyniligt, og vit kunnu als ikki fara at dylja grindadráp, tí veruleikin er sum hann er. Um grindadráp ikki tolir at koma á internetið, so kunnu vit snøgt sagt ikki drepa grind longur, sigur Eirikur
Lindenskov.
Aftur í dag er grindadráp á skránni hesaferð í Hvannasundi. Eisini hendan greinin, sum eitur Grindin hildin til er nógv lisin, og yvir 60 viðmerkingar eru til greinina, og nógvar av
teimum eru frá útlendingum.
