Tað hevur ikki verið lætt at fáa fólk at manna nevndina hjá Skála Ítróttarfelagi, sum harnæst hevur havt eitt fíggjarliga tungt ár í 2019, men eftir aðalfundin í kvøld er nýtt fólk komið til og vónir eru um eitt bjartari ár í ár.
- Fíggjarætlan og raksturin fyri 2020 er tilrættislagdur soleiðis at felagið skal koma út við skinninum á nøsini í ár, skrivar Skála IF á facebook.
Formaðurin, Rógvi Reinert Djurhuus, hevur valt at taka seg úr nevndini, og harvið skal Skála hava ein nýggjan formann. Hesin verður funnin á næstkomandi nevndarfundi, skrivar Skála.
Nýggj fólk í Skála-nevndini eru Malena Jacobsen, Ingi Hansen, Teitur Reinert Joensen og Bogi Kallsberg. Annika Klein og Per Mikkelsen halda fram í nevdini, meðan Arni Klein Abrahamsen er tiltakslimur.
