Hondbóltur ? kvinnur
Sum vant var VÍF stórfavorittur, tá tær sunnudagin spældu heimadyst. Hesa ferð móti Neistanum. Gaman í var talan um dyst móti liðnum, sum í løtuni er á triðja plássinum í kappingini, men føroyska kappingin er nú bara soleiðis, at VÍF so avgjørt er í einum flokki fyri seg.
Dovislig byrjan
Fyrstu løtuna var tó ikki so nógv, sum bendi á, at talan skuldi vera um nakran stóran styrkismun. Neistaliðið hevði gott tak á VÍF. Tær stríddust manniliga í verjuni, og í álopinum eydnaðist teimum tríggjar ferðir á rað at spæla Gunnleyg Berg leysa inni á strikuni, soleiðis at brotskast spurdist burturúr.
Spakuliga kom VÍF tó betri við, og miðjan hálvleikin byrjaðu tær so at draga frá mótstøðuni.
Ikki minst tóktist Sóleu Mikkelsen at vera sera væl fyri, og saman við Ioanu stóð hon fyri nærum øllum málunum hjá VÍF hendan dagin. Júst hetta at hava somikið sterkar einstaklingar, er eisini ein av stóru styrkjunum hjá VÍF.
Serstakliga í fyrra hálvleiki høvdu tær ilt við at fáa nakra veruliga ferð á spælið, men tað kostar koritni einki, tá spælarar so kunnu taka málið í egnar hendur.
Í seinna hálvleiki var skjótt greitt, at her var ikki so øgiliga nógv at tosa um. VÍF bara økti um leiðsluna, og líka mikið, hvussu Neistin so enn royndi, so rendu tær seg inn í antin verjuna ella sum altíð stór spælandi Manuelu Stan í VÍF málinum.
At sigurin so kortini ikki gjørdist nakað serliga stórur í tølum, komst av, at VÍF kundi taka sær av løttum seinastu løtuna av dystinum. 10 minuttir fyri leiklok var støðan annars 21-12 til VÍF, men Neistin slapp so at pynta nakað væl um hesa løtuna, men í vanda var sigurin hjá VÍF so ongantíð.
Fult hús
Við sigrinum restar bert ein dystur í hjá VÍF, fyri at tær annað árið á rað kunnu fara í endaspælið við fullum stigatali. Einasti dysturin, sum restar, er útidysturin móti Sóljuni, og tað ber illa til at ímynda sær, at hesin ikki eisini skal geva fulla úrtøku.
Hjá Neistanum er ikki so nógv annað at gera, enn at lata hendan dystin fara framvið. Tær eru framvegis á triðja plássinum, og her harðnaði kappingin eftir VB sigurin á Stjørnuni. Einki er at ivast í, at Neistin ætlar sær at halda fast um hendan sessin, og tær hava møguleika at styrkja um støðuna, tá VB kemur á vitjan í seinasta dystinum í grundspælinum.
Dysturin í tølum
VÍF-Neistin 23-19 (11-7):
Málskjúttar:
VÍF: Sóley Mikkelsen 7(2), Ioana Rápa 7(1), Nicoleta Radu 6(1), Barbara á Rógvu 1, Fríða Marjunardóttir 1(1), Jacklin Durhuus 1
Neistin: Katrin á Neystabø 6(3), Mildrid Jacobsen 4, Súna Mørk 3(1), Susan Brockie 2, Gunnleyg Bert 2, Kára á Dunga 1, Annika Thomsen 1
Brotskøst: VÍF 9, Neistin 11
Útvísingar: VÍF 4, Neistin 6
Dómarar úr Tjaldri: Kári Hansen & Trúgvi Mortensen. hHildu eina hampuliga harða linju gjøgnum allan dystin.
