Hóast tað var væntandi, at býráðið í Havn fór at geva byggiloyvi til nýggju kirkjuna á Argjum, so var meirilutin ikki so stórur, sum roknast kundi við.
Ein orsøk var, at báðir býráðslimirnir hjá kommunulistanum hava broytt støðu, síðani teir eru endaðir í andstøðu í Tórshavnar býráð. Og tí at bæði Elsa Berg, borgarstjóri, og Anja Weyhe, forkvinna í byggi- og býarskipanarnevndini, atkvøddu í móti teirra egna fakkunnleika í umsitingini hjá Tórshavnar kommunu.
Tá málið var fyri í byggi- og býarskipanarnevndini atkvøddi Anja Weyhe fyri málinum og at beina tað í býráðið. Men hon hevur so broytt støðu, síðani málið kom í býráðið, tá atkvøddi hon ímóti.
Tá byggiloyvið varð givið fyrru ferð tann 29. februar í fjør, varð tað samtykt við átta atkvøðum.
Hesaferð atkvøddu Heðin Mortensen, Birgir Nielsen, Annfinn Brekkstein og Kristianna Winther Poulsen tað sama sum seinast. Teir tríggir fyrru 'ja', meðan Kristianna Winther Poulsen aktvøddi 'nei'.
Tróndur Sigurðsson og Kári Johansen úr Kommunulistanum hava báðir broytt støðu, síðani teir sótu við ábyrgd í Tórshavnar býráð. Tróndur Sigurðsson atkvøddi fyrru ferð 'ja' og hesaferð 'nei'. Kári Johanesn atkvøddi fyrru ferð 'ja' og hesaferð 'blankt'.
Av teimum nýggju býráðslimunum atkvøddu Heidi Lava Elgeirsdóttir, Bergur Robert Dam Jensen, Guttormur í Skála og Høgni Vilhelmsen 'ja', meðan Annita á Fríðriksmørk og Anja Weyhe atkvøddu 'nei'. Elsa Berg, sum var í farloyvi tá atkvøtt varð seinast, atkvøddi 'nei' hesaferð.
Tá byggiloyvið varð givið, tann 29. februar í fjør, atkvøddi Tórshavnar býráð soleiðis:
Fyri byggilloyvi atkøvddu:
Annfinn Brekkstein úr Sambandsflokkinum
Heðin Mortensen úr Javnaðarflokkinum
Tróndur Sigurðsson úr Javnaðarflokkinum
Kári Johansen úr Javnaðarflokkinum
Bjørg Dam úr Javnaðarflokkinum
Birita Baldvinsdóttir úr Javnaðarflokkinum
Birgir Nielsen úr Fólkaflokkinum
Jákup Dam úr Tjóðveldi
Ímóti artkøvddu:
Turið Horn úr Tjóðveldi
Annika Olsen úr Tjóðveldi
Jón Kragesteen úr Tjóðveldi
Súsanna Olsen úr Framsókn
Kristianna Winther Poulsen úr Javnaðarflokkinum
Síðani hevur verið býráðsval og nýggj býráðssamgonga er skipað, og nakrir býráðslimir eru útskiftir.
Atkvøðugreiðslan hesaferð fall soleiðis:
Fyri atkvøddu:
Heðin Mortensen
Heidi Lava Elgeirsdóttir
Bergur Robert Dam Jensen
Guttormur í Skála
Høgni Vilhelmsen
Birgir Nielsen
Annfinn Brekkstein
Ímóti atkvøddu:
Elsa Berg
Tróndur Sigurðsson
Annita á Fríðriksmørk
Anja Weyhe
Kristianna Winther Poulsen
Blankt:
Kári Johansen.
Málið varð samtykt við 7 atkvøðum fyri, 5 atkvøðum ímóti og einari blankari atkvøðu.
