Í løtuni eru fýra partrolarapør til fiskiskap eftir upsa, og skipini fáa eisini nakað av hjáveiði.
- Partrolararnir koma inn at landa, sum næsta vika gongur, men fiskiskapurin kundi verið betri. Trý partrolarapør eru á gulllaksaveiði.
Á Fiskamarknaði Føroya vita tey í dag at siga, at bara ein djúpvatnstrolari er til fiskiskap í løtuni. Teir fiska svartkalva og koma væntandi inn at landa fyrst í vikuni sum kemur.
Í løtuni eru tveir av teimum smáu trolbátunum til fiskiskap. Ein er á landgrunninum og kemur inn at landa mánadagin. Hesin hevur mest av toski, tungu, havtasku og reyðsprøku.
- Hin trolbáturin, sum eisini er til fiskiskap, er á Íslandsrygginum. Teir eru nýliga byrjaði túr. Tí verður ikki roknað við, at hesin trolbáturin kemur inn at landa fyrr enn síðst í næstu viku.
Á Fiskamarknaði Føroya vita tey eisini at siga, at eitt garnaskip fiskar svartkalva, og eitt fiskar havtasku.
- Teir, sum fiska svartkalva, hava smáligan fiskiskap, men garnaskipið, sum fiskar havtasku, hevur brúkiligan fiskiskap. Bæði skipini landa í næstu viku, verður lagt aftrat.