ÍF heldur fram við at brynja seg til seinnu helvt av kappingarárinum í Effodeildini. Felagið kunngjørdi fyrr í dag, at tað hevði leigað Magnus Jarnskor úr Víkingi, og nú eru tveir mans komnir til afturat.
Les eisini: ÍF leigar gøtumann
Spanski verjuleikarin, Pedro Tarancon Anton, sum seinasta hálvaannað árið hevur spælt við B68, hevur gjørt sáttmála við ÍF. Hann er 31 ára gamal og hevur spælt tilsamans 29 dystir fyri B68, nú hann aftur sleppur at royna seg í Effodeildini.
Umframt hann, so hevur Poul N. Mikkelsen eisini gjørt sáttmála við ÍF. 22 ára gamli verjuleikarin, ið er sonur ÍF-venjaran, Jákup Mikkelsen, hevur drigist við drúgvan skaða, men verður sambært ÍF-heimasíðuni klárur at spæla aftur um ein mánaða ella so.
ÍF er á aftasta plássi í Effodeildini við seks stigum. Næsti dystur hjá teimum verður á útivølli ímóti Víkingi tann 21. juli.
