Skála, sum komandi ár spælir í næstbestu deildini, hevur gjørt sáttmála við Pedro Tarancon Anton, sum var fyrsti spaniólin í føroyskum fótbólti.  - Í kvøld hava Pedro Tarancon Anton og Skála ÍF skrivað undir sáttmála fyri komandi kappingarár.  Pedro er spanióli, og er 34 ár (fyllir 35 tann. 18.12.). Hann hevur spælt í Føroyum seinastu fimm árini, mest við B68, skrivar Skála. Tað var í 2016, at B68 fekk tilgongd av Pedro Tarancon Anton og Carlos Quintana Herrero. Meðan áleyparin, Carlos Quintana Herrero, fór aftur til Spania eftir hálva kapping, so endaði Pedro Tarancon Anton við at gifta seg her í Føroyum. Hann hevur spælt við B68, men royndi seg eitt skifti eisini í ÍF. Í fjør fór hann til AB, men avbjóðingar við arbeiðs- og uppihaldsloyvinum gjørdu, at hann ikki kundi spæla. Hann verður nú partur av liðnum hjá Sorini Anghel og Skála komandi kappingarár.