Hetta er tó bert ein partur av uppskotinum, sum áður eisini hevði ásetingar um serligar lutaíbúðir, ætlaðar fólki við breki, men hesin parturin varð tikin burtur, og tað harmast forkvinnan í MBF, Leila Solmunde, stórliga um.
- Vit høvdu tað upprunaliga uppskotið til hoyringar, og kundu tá bert fegnast um, at nú hómaðist ein serligur fíggingarmøguleiki, m.a. til fólk, sum bert hava eina fyritíðarpensión. Hesi fólk hava ongar sum helst fíggjarligar møguleikar at finna sær býli á privata íbúðarmarknaðinum, sigur Leila Solmunde, sum staðfestir, at politiski myndugleikin hevur ongantíð áður havt so stórar ætlanir, men samstundis hevur ongantíð verið gjørt so lítið sum nú.
- Í sonevnda bústaðarpakkanum, sum vit nú hava bíðað eftir í mong ár, var umframt leigulógin, alternativir bústaðarmøguleikar og serligir fíggingarmøguleikar til fólk við breki. Men nú, tá avtornaði, verður bert møguleikin at fáa lán til bjálving. Hetta hóast at sagt verður í samgonguskjalinum, at ætlanin er at gera møguleikar fyri alternativa íbúðarbygging. Her er langt millum orð og gerðir, má forkvinnan í MBF ásanna.
Leila Solmunde sigur seg vera sera hørm um ta lagnu bústaðarpakkin higartil hevur fingið.
- Eg havi veruliga trúð tí sum politikararnir hava sagt um nógv umtalaða bústaðarpakkan, og sum vera man serliga tá ræður um bústaðarmøguleikar fyri brekað og serligu fíggingini, sum talan hevur verið um. Men nú trúgvi eg satt at siga einki uppá tað longur. Er eri ómetaliga vónsvikin av at politikararnir ikki vilja annað og meira við Húsalánsgrunninum nú broytingar eru samtyktar, sigur forkvinnan í MBF sum heldur, at um vilji ikki er til lutaíbúðir, so kundi verið byrjað við leiguíbúðum.
- Politiska tosið um bústaðarpakka í mong ár er at halda fólk fyri tað turra spott. Tað var nógv betri um politikararnir søgdu erligt, at teir ikki ynskja nakrar alternativar bústaðarmøguleikar, tí so vistu vit tað, sigur Leila Solmunde.
Torfinn Smith hevur skrivað greinina til MBF blaðið sum kemur út í næstu viku.
