Leygardagin 6. mars ? tað er í morgin ? verður tann árliga stórkappingin í rútmiskum fimleiki í ítróttarhøllini á Kambsdali.
Kappast skal í trimum aldursbólkum ? pinkur, smágentur og gentur ? og feløgini, ið eru við, eru TF, HF, Ljósið og Støkk. Harumframt verða gestalið við úr Flog, Fok, Støkk og Ljósinum. Tilsamans skulu trettan lið kappast í teimum trimum aldursbólkunum ? fýra hjá pinkum, fýra hjá smágentum og fimm hjá gentum.
Eingin kapping er hjá kvinnunum í ár, og er hetta orsakað av vantandi leiðarum og íðkarum.
Pinkurnar kappast bert við einari seriu, meðan smágenturnar og genturnar skulu gera eina fría seriu og eina við amboði. Í ár hava smágenturnar bólt sum amboð, meðan genturnar skulu royna seg við hoppibondum.
Serligar viðtøkur
fyri Føroyar
Tann føroyska stórkappingin koyrir eftir somu reglum sum donsku Grand Prix-kappingarnar, men tó eru nakrar serligar viðtøkur, sum bert eru galdandi í Føroyum.
Til stórkappingina eru fýra dómarar, sum geva karakterir, umframt tveir høvuðsdómarar. Í stuttum kann sigast, at dømt verður bæði tøkniligt, har serligur dentur verður lagdur á torleikastøðið, og listarligt, har mest verður hugt eftir koreografiini.
Byrjað verður við innmarsjinum klokkan 14.00, og síðani setir Andreas Lamhauge, formaður í FFS, kappingina.
Síðani verða kappingarnar í raðfylgjuni pinkur, smágentur (frí íðkan), smágentur (amboð), gentur (frí íðkan), og gentur (amboð).
Kappingin hjá pinkum og smágentum verða avgreiddar við heiðursmerkjahandan, áðrenn genturnar koma inn á gólvið. Kappingin verður væntandi liðug klokkan 17.00.
