Tað er nú greitt, at stórfingna tiltakið, Mentanarnáttin, verður avlýst í ár. Tiltakið skuldi langt síðani havt verið, men tað var útsett í sambandi við koronu, men nú farsóttin aftur er farin at ganga í Føroyum, boðar kunningarstovan í Havn frá, at tað tiltakið verður avlýst heilt.
Seinastu mongu árini hevur Mentanarnáttin verið fyrsta fríggjadag í juni mánað og tað plagdi vera pinnpakkað við fólki í býnum, akkurát sum á ólavsøku. Men koronu-tilmælini gjørdu, at í fyrstu atløgu varð tað avgjørt útseta hana til 11. september.
Tá varð møguleikin at avlýsa Mentanarnáttina eisini umrøddur, men í fyrstu atløgu varð gjørt av at útseta til í september. Men nú er so greitt, at eingin Mentanarnátt verður í ár, siga tey.
Fyrireikararnir vísa á, at nógv tíð og orka verður løgd í at fyrireika og at leggja skrá og tiltøk til rættis, og byrjast má í góðari tíð. Men tað er enn ivasamt, hvussu støðan við koronu verður í september, og tí ber illa til at gera neyvar fyrireikingar.
– Tí varð tað hildið vera skilabest at avlýsa Mentanarnáttina í ár og í staðin fyrireika seg til at at koma sterkt aftur fríggjadagin 4. juni í 2021, tá Mentanarnátt eftir ætlan aftur verður í Havn, siga tey.
