Hetta seinasta árið er tað vorðið 7,3 prosent dýrari at liva. Tað staðfestir Hagstovan í eini nýggjari uppgerð. Hagstovan sigur, at annan ársfjórðing í ár vóru prísirnir 7,3 prosent hægri enn teir vóru fyri annan ársfjórðing í fjør og tað er størsta príshækking hesi seinastu14 árini.
Høvuðsorsøkin til at prístalið er hækkað so nógv hesa ferð er, at prísurin á bensini, diesel og húsarhaldsoljum er hækkaður so nógv. Men sum nakað nýtt er tað nú eisin nógv dýrari at gista á hotelli og at eta á matstovum, men tað er eisini dýrari at keypa klæðir og skógvar, og samskifti er eisini dýrkað.
Samstundis er prísurin á mati og drykkjuvørum nú 6,2 prosent hægri enn fyri einum ári síðani. Sí talvuna niðanfyri.
##med2##
Ein av stóru útreiðlsupostunum hjá einum húsarhaldi, er rentur og avdráttur uppá húsalán og húsarhaldsolja. Hagstovan sigur, at bara hendan seinasta ársfjórðingin er prísurin á húsarhaldsolju farin 29 prosent upp og hetta seinasta árið er oljan dýrkað heili 68 prosent.
Men bensin og diesel til bilar er eisini ein stór útreiðsla. Í Føroyum er hevur prísvøksturin á brennievni til akfør verið umleið tann sami sum miðalvøksturin í ES-londunum. Tó sæst á myndini niðanfyri, at hendan seinasta ársfjórðingin er prísurin øktur lutfalsliga meiri í Føroyum enn í ES-londunum.
##med3##
Talan er eisini um stórar prísbroytingar fyri at gista á gistingarhúsum. Eftir stóra fallið í prísinum undir koronufarsóttini, tá eftirspurningurin eftir at gista var lítil, er tað 47 prosent dýrari at gista nú enn fyri einum ári síðani Tó hevur hetta lutfalsliga lítla ávirkan á støðuna, tí taðlan er ikki um eina serliga stóra útreiðslu. Men prísurin á mati er eisini uppfarin. Sí talvuna niðan fyri
##med4##
Hagstovn sigur, at í Føroyum eru príshækkingarnar umleið tær somu, sum í øðrum londum, kanska nakað minni. Prísvøksturin í Danmark hevur verið 7,4 prosent og í Noregi 7,5 prosent. Nakað hægri var prísvøksturin í Íslandi og í Finnlandi, sum var 7,6 prosent. Svøríki hevur enn hægri prísvøksur upp á 7,7 prosent – og í ES sum heild, hevur hækkingin verið 7,8 prosent.
##med5##
