Fyri føroyskan fótbólt og serliga fyri HB var talan um øgiligt vónbrot, tá ið greipuvinnararnir í HB í kvøld spældu hálvfinalu í innleiðandi umfarinum í europeisku meistarakappingini.
HB átti heimavøll í Albania ímóti Inter Escaldes úr Andorra. HB var roknað at vera ikki so lítil favorittur, men tað var Inter Escaldes Andorra, sum vann 1-0 og harvið heldur fram í kappingini, sum endar fríggjakvøldið. Tá verður finala um at halda fram í meistarakappingini.
Í HB høvdu tey vónað, at liðið fór at spæla finalu fríggjakvøldið. Soleiðis verður tað ikki. Nú rigga tey í HB til at fara til hús. Týskvøldið verður síðsti dysturin undan stutta summarsteðginum – á útivølli ímóti B68 – og so fer HB eftir summarsteðgin at taka lut í Conference League.
Í nógva hitanum á Balkan í kvøld var talan um ikki væl spældan fótbóltsdyst. Ofta varð tað sparkað meiri, enn tað varð spælt, og tá ið liðið úr Andorra eftir horna úr høgru í 61. minutti legði seg á odda, snúði tað seg hjá teimum fyrst og fremst um at geva sær góðar stundir og halda tørn um leiðsluna.
Tølini siga, at HB hevði væl fleiri royndir á og framvið málinum hjá mótstøðuliðnum. Men tað var ongantíð friður og hugflog yvir samanspælinum, og hóast Hilmar Leon Jakobsen kastaði innkastini heilt langt inn í málteigin, so kendist málverjin og verjan støðugt at hava tak á støðuni.
Umframt at vera stórt vónbrot fyri HB, sum av álvara ætlaði at gera um seg í hesi kappingini í ár, so er hetta stórt vónbrot fyri føroyskan fótbólt. Sigrar og stig eru avgerandi fyri, hvussu nógv føroysk lið eiga rætt at taka lut í europeisku kappingunum, og avrikið og úrslitið í kvøld telur avgjørt ikki rætta vegin.
HB skal í Conference League spæla ímóti vinnaranum av dystinum millum HJK Helsinki og Buducnost úr Montenegro. Dysturin á útivølli verður 22. juli og heimadysturin verður sjálvan ólavsøkudag.
HB – Inter Escaldes Andorra 0-1 (0-0)
Innleiðandi kapping í Champions League
Á Niko Dovana Stadium Durres í Albania týsdagin 22. juni 2021 kl. 19.00
0-1: Jordi Betriu Armengol 61.
Dómarabólkur úr Estlandi: Joonas Jaanovits, Aron Härsing, Riivo Stolts og Karl Koppel (4. dómari)
HB: Teitur Matras Gestsson – Mads Mikkelsen (Stefan Radosavljevic, 88.), Bartal Wardum (Hanus Sørensen, 88.), Hørður Askham, Daniel Johansen – Michal Przybylski (Áki D. Samuelsen, 84.), Heðin Hansen, René S. Joensen – Hilmas Leon Jakobsen, Mikkel Dahl, Adrian Justinussen (Pætur J. Petersen, 66.)
Á beinkinum: Rói Mørk Hentze, Moro, Dan í Soylu, Odeh, Heri H. Mohr, Samuel Johansen Chukwudi
Venjari: Jonas Dal Andersen