Útlendskir miðlar vita í morgun at siga, at størsta herflotaskipið hjá Iran er burturgingið í Omanvíkini, eftir at eldur kom í skipið. Tað er ógreitt, hví eldurin kyknaði.
Í tíðindum hjá hálv almennum iranskum tíðindamiðlum verður sagt, at talan er um hernaðarliga flutningsskipið, Kharg. Eldurin kyknaði í nátt klokkan 02.25, og tað eydnaðist ikki at sløkkja.
Miðlarnir skriva, at skipið lá við havnina í Jask, 1270 kilometrar í ein landsynning úr Tehran og nær Hormuz-sundinum.
Tíðindastovan Irna visti fyrst at siga, at bjargingin av Kharg var miseydnað - uttan at siga nakað ítøkiligt um, hvat lá í boðunum. Seinni komu so boðini um, at skipið var sokkið.
Í sosialum miðlum í Iran síggjast myndir av fólki, sum vera tikin av skipinum, meðan skipið brennur í bakgrundini.
Sambært útlendskum miðlum var Kharg eitt av fáum skipum hjá Iran, sum kundi flyta veitingar til herflotan. Skipið kundi flyta tungt góðs og hevði tyrlupallar á dekkinum.
Kharg er sambært útlendskum keldum bygt í Stórabretlandi og varð sjósett í 1977. Skipið var fleiri enn 200 metra langt og var uppkallað eftir oynni, Kharg, har ein stórur iranskur oljuterminalur liggur.
##med2##
Missurin av Kharg er hin seinasti í einari røð av vanlukkum í iranska herflotanum. Undir einari hernaðarvenjing í 2020 rakti ein rakett av óvart eitt herflotaskip, har 19 av manningini lótu lív og 15 fingu skaða.
Og í 2018 sakk eisini eitt herflotaskip hjá Iran í Kaspiska Havinum.