Fyrrapartin í dag segði fakligi stjórin í norska Fólkaheilsustovninum, Frode Forland, at møguleikin fyri, at hann sjávur verður smittaður við omikron-frábrigdinum er stórur.
Hetta segði hann í samband við, at Dagbladet spurdi hann, hvussu hann metir møguleikarnar fyri sjálvur at gerast smittaður, og hvørjar vandar hann sær við hesum.
- Vandin er lutfalsliga stórur. Eg eri ein maður, sum eri nakað uppi í árunum, og tí eigi eg at verja meg sum best við eitt nú at brúka masku, vaska hendur og halda frástøðu, har eg eri í vanda fyri at gerast smittaður.
Stjórin sigur, at hann soleiðis roynir at sleppa undan smittu. Hann er koppsettur tríggjar ferðir og soleiðis eisini væl vardur móti álvarsligari sjúku.
- Tískil er ikki nógv órógv í mær um hetta. Hinvegin er møguleikin fyri, at eg - fyrr ella seinni - gerist smittaður við omikron lutfalsliga stórur, sigur Frode Forland.
Tað er væntandi, at mong fara at gerast smittað, nú vetrarbylgjan herjar.
- Vit royna at seinka smittuspjaðingini, soleiðis at ikki alt ov mong gerast smittað samstundis, sigur fakligi stjórin í norska Fólkaheilsustovninum, Frode Forland, við Dagbladet.
