Tvey stór og trý smærri ísfiskalínuskip eru til fiskiskap í løtuni.
Eitt er í Íslandi og kemur helst heim at landa fyrst í næstu viku. Hini eru øll undir Føroyum og koma eisini inn at landa í næstu viku.
- Skipini fáa mest av toski, hýsu og longu, vita tey á Fiskamarknaði Føroya at siga.
Umframt ísfiskalínuskipini eru eisini níggju frystilínuskip til fiskiskap í løtuni. Átta eru í íslendskum sjógvi, og eitt fiskar undir Føroyum.
- Streymurin harðnar, sum næsta vika gongur, og veðrið verður umskiftandi. Tí verður ikki roknað við nógvum útróðri teir næstu dagarnar, verður lagt aftrat.